1-мавзу: таълимда менежмент психологияси фанининг предмети менежмент фани предмети ва вазифалари

учинчидан, ваколатлар бевосита университетларга тақдим этилади. Бунда марказий орган стратегик бошқарувни амалга ошириш билан чекланади. Бундай тизим миллий тизимларда кичик доираларда қўлланилади.
Айни дамда Франциянинг Гренобль шаҳридаги II университет ходими Н.Монс таълим соҳасида менежмент концепциясини бошқача асосда шакллантиради ҳамда марказлаштиришдан четлашиш принципига асосан ўзининг таснифини таклиф қилади: 1) ваколатларни “минимал” ўтказишга асосланган мамлакатлар (la décentralisation minimale – Франция, Португалия, Греция, Люксембург, Япония, Корея каби давлатларда қўлланилади, уларда олий таълим соҳасида лавозимга тайинлаш, таълим муассасаси аттестацияси, аниқ фанлар бўйича талаба ва ўқитувчиларга ўқув юкламалари ҳажмини белгилаш ва бошқа шу каби масалалар таълим соҳасидаги марказий орган (таълим соҳасидаги вазирлик) томонидан белгиланади); 2) ваколатларни “ўртача, мутаносиб” ўтказишга асосланган мамлакатлар (la décentralisation collaborative – Скандинавия давлатлари, Польша, Чехия каби давлатларда қўлланилади, уларда давлат таълим стандартларини белгилаб беради: мажбурий ўқув курсларини ўрнатади, уларнинг ўқув ҳажмини, иш ҳақи миқдорини белгилайди ва б.қ.; айни дамда таълим субъектлари маҳаллий даражада педагогик стратегияни танлашда, кадрларни олишда эркин бўлади); 3) ваколатларни “қатъий” қуйи бўғинларга ўтказган мамлакатлар (la décentralisation volontariste – Венгрия, Янги Зеландия, Испания каби давлатларда қўлланилади, таълим соҳасини бошқаришни марказлаштириш сиёсатидан буткул воз кечганлар, ушбу давлатларда давлатнинг фақатгина мувофиқлаштириш ва назорат қилиш функциялари сақланиб қолган; маҳаллий ҳокимият органлари эса, таълим тизими соҳасида бевосита тезкор бошқарувни амалга оширадилар, шу мақсадда тегишли қарорлар қабул қиладилар; олий таълим муассасалари бу соҳада юқори даражада мустақил бўладилар); 4) федерал тузилишга эга давлатларда таълим соҳасидаги ҳокимият ваколатларини ўтказиш (АҚШ, Бразилия, Германия, Канада, Швейцария). Ушбу тизим мазкур давлатларда бир вақтнинг ўзида марказлаштириш ва марказлаштиришдан чекиниш тенденциялари амал қилиши билан тавсифланади. Гувоҳи бўлганимиздек, хорижий мамлакатларда ислоҳотлар асосан таълим муассасаси эркинлиги ва мустақиллигини кучайтиришга қаратилган.