Баённомаси тошкент ш. 09. 04. 2022 й., соат 14: 00

Ички тақризчи (г.ф.н. доц. З.Т.Абдалова) томонидан берилган тақриз доц. М.И.Назаров томонидан ўқиб эшиттирилди. XXI асрда дунё мамлакатларининг иқтисодий жиҳатдан ривожланиши, иқтисодий тармоқлар таркибида туризм тармоғи аҳамиятининг ортиб бориши, Осиё мамлакатлари шунингдек, мамлакатимизда ҳам Туризмга бўлаётган эътиборнинг йилдан-йилга ортиб бориши натижаси ўлароқ, республикамиз жумладан, Фарғона вилоятида ҳам миллий ва халқаро туризмни жадал суръатларда ривожлантириш давом этиб келмоқда. Бунга, 2019-йил давомида 5 та қарор, 2 та Фармон қабул қилингани ва алоҳида дастур чора-тадбирлари ишлаб чиқилгани яққол мисолдир. Бу эса, кун сайин юртимизга ташриф буюраётган туристлар сонининг ошиб бораётгани, аҳолининг ҳудудий жойлашуви, ресурслар билан таъминланганлик даражаси шунингдек, яшаш шароитларида катта ўзгаришларни вужудга келтирмоқда. Aмалга оширилган тадқиқот ишида, бугунги кундаги айни зарурий масала тавсифланган бўлиб, айниқса, унда мамлакатимизнинг энг аҳоли зич жойлашган ҳудуди Фарғона водийси мисолида амалга оширилганлиги, унинг илмий аҳамиятини янада оширади. БМТ нинг 2030-йилгача барқарор ривожланиш дастурида ҳам аҳоли пунктлари очиқлиги, хавфсизлиги, умри боқийлигига оид вазифаларни ечиш долзарб эканлиги таъкидланган бўлиб, бу илмий тадқиқот ишининг нафақат мамлакатимизда, балки дунё миқёсидаги зарурий масала эканлигини, туризм орқали аҳолини иш билан таъминлаш, яшаш шароитларини янада яхшилашга катта ҳисса қўшишини яна бир бор асослайди.
Юқоридагиларни ҳисобга олган ҳолда, магистрант Б.Ғ.Носировнинг “Фарғона вилоятида туризмнинг ривожланиши, йўналишлари ва ҳудудий тафовутлари” мавзуси куннинг долзарб мавзуларидан бири эканлиги билан ажралиб туради. Тадқиқот ишида туризмнинг ривожланиш тамойиллари, унинг вилоят ҳудудида мавжуд турлари, сўнгги йилларда берилаётган эътибор ва давлат, ҳукумат сиёсати масалалари тадқиқ қилинган, ҳамда махсус индекс орқали Фарғона вилояти ва ҳудудларини туристик гуруҳларга ажратилганлиги ҳам, катта аҳамиятга ега. Магистрант томонидан тадқиқот ишини бажаришда ўз олдига қўйган вазифаларидан келиб чиқиб, Туризмни турлари, унинг вилоятда мавжуд турлари, аҳолининг ҳудудий жойлашувига таъсири тўлақонли ўрганилган ва унинг картографик карталари ишлаб чиқилган. Шунингдек, ҳудудни 3 та туристик гуруҳга ажратилиб ва улардаги жойлаштириш объектлари, туристик объектлар сони, йиллик ташриф буюрувчи туристлар сони, инфраструктура даражасининг ривожланиш кўрсаткичлари ҳисобланганлиги, маъмурий ҳудудий бирликларнинг реал туристик сиғими ва ҳозирда мавжуд, демографик ҳамда иқтисодий ҳолати таққослаб берилган.
Тадқиқот ишида республика статистика қўмитаси, Фарғона вилояти статистика бўлими, шунингдек, маҳаллий ҳокимликлар маълумотларидан фойдаланилганлиги ишнинг ишончлилиги ҳамда амалиётга қўллашда қулайликларини таъминлаб берган. Жумладан, тадқиқот ишига қуйидагиларни киритишни таклиф қилиш мумкин:
Тадқиқот ишида келгуси йилларда амалга оширилиши режалаштирилган ва бундан кутилган туристик оқим миқдори, ҳудудларнинг меъёрий демографик ва туристик сиғими ишлаб чиқилганда ёки келгусида қайси ҳудудларда туристик юк ортиши, Туризм таъсирида аҳоли ҳаётида ўзгаришлар янада яққол сезилишига оид прогнозлар, карталар тайёрланганда ишнинг мазмуни янада тўлиқ тасвирланган бўлар еди. Юқорида келтирилган фикрлар, ишнинг ютуқ ва қисман мавжуд камчиликларидан келиб чиққан ҳолда, қуйидаги ҳулосага келиш мумкин:
Тадқиқот ишига оид барча маълумотларнинг олинганлиги, улардан самарали фойдаланилганлиги, таҳлил қилинганлиги ва ишдан кўзланган мақсад ва вазифаларнинг тўла амалга оширилганлигини ҳисобга олиб, ишни аъло деб баҳолаш мумкин.