Ekologiyamiz muhofazasi uchun kurashaylik!

Ekologiyamiz muhofazasi uchun kurashaylik!

Assalomu alaykum, hurmatli komissiya a‘zolari!

Men, Ahliya Ochilova, quyida Siz azizlar bilan o‘z kreativ g‘oya va qarashlarimni bo‘lishish niyatidaman.

Siz-u bizga ma‘lumki, har bir g‘oyaning, albatta, kelib chiqish sababi, negizi va yo‘naltirilgan ma‘lum mavzusi bo‘ladi. Hozirda Sizga taqdim qilmoqchi bo‘lgan g‘oyaning yaralish sababi bugungi kun ehtiyoji bilan bog‘liq, ya‘ni ekologiya sohasiga oid.

Ma‘lumki hammamiz har kuni nimaningdir ilinjida harakatdamiz, rejalashtirilgan manzilimizga borish davomida, yoki bo‘lmasa tabiat qo‘ynida dam olish chog‘imizda turli hodisalar guvohiga aylanamiz. Ya‘ni, atrofimizdagi insonlarning hammasi ham atrof-muhit tozaligiga e‘tibor bermaydi, ma‘lum qoidalarga rioya qilmaydi. Afsuski, bugungi kunda ko‘pchilik insonlar yo‘l yurishi davomida chiqayotgan chiqindilarni maxsus savatlarga emas, balki yo‘l-yo‘lakay tashlab ketishmoqda. Bu, albatta, o‘z o‘rnida ko‘rkamlashib, obodonlashib borayotgan yurtimiz ko‘rkini buzmasdan qolmayapti. Shu o‘rinda yana bir achinarli holatni keltirib o‘tishga ijozat bergaysizlar! Ba‘zi bir insonlar bilan muloqotda bo‘lishim mobaynida, ularning fikrlaridan lol qolganman. Ularning fikricha, faqatgina Obodonlashtirish Markazi ishchilari atrof-muhit tozaligiga e‘tibor berishlari kerak. Nahotki, inson qadri shunchalar past, nahotki, insonlar bir-birlariga yordam berishni o‘zlariga ep ko‘rmaydilar! Qadr-qimmat, hurmat kabi tushunchalar faqat so‘zlarda bo‘lsa?!

Men o‘ylaymanki, atrofimizda yuz berayotgan bu xunuk hodisalarga chek qo‘yish vaqti keldi! Keling, atrof-muhit tozaligiga putur yetkazuvchilarga chora ko‘raylik, jarima joriy qilaylik, ommaga tanitaylik, zero, nafaqat o‘zi, balki oila a‘zolari ham faqatgina foydali ishlar ortidan yurishsin! Qadim va navqiron shaharlarimizga kelgan sayyohlarda nafaqat tariximiz, milliy taomlarimiz, mehmondo‘stligimiz bilan, balki tozalik bilan ham yaxshi taassurot qoldiraylik! Barchamiz yuksalib borayotgan betakror diyorimizning yanada yuksalishiga o‘z hissamizni qo‘shaylik!

Hurmat bilan Ahliya Ochilova, Samarqand davlat chet tillar instituti 4-kurs talabasi.