Kechirish va imutish aqlli insonlarning intiqomidir

Hamma narsa o'z yo'lida ketayotganida, to'satdan eng ishongan kishing ishonchingni poymol qiladi. Insonni eng ko'p qiynaydigan narsa mana shu.

Tangri kechirmasin

Mening aslo insonlarni osonlikcha qarg'aydigan odatim yo'q. La'natlashga munosib bo'lgan insonlarga ham ko'z yumaman. Menda shunday bir vijdon bor-ki, qalbimni sindirganga zinhor ayni ishni takrorlay olmayman. Menda hech qachon "Mening jonimga azob berdi, endi men ham qalbini parchalayman", degan qasos tuyg'ulari bo'lmadi. Men hamisha Ilohiy adolatning odilligiga ishonib yashadim. Dilimni og'ritib ketganni qarg'ash o'rniga, uni dilimning Egasi hukmiga havola qildim. Zero, U hamma narsaning eng afzalini biladi, dedim. Chunk! biror insonni qarg'agan kunimning tunida ko'zimga uyqu kelmaydi. Ko'nglim g'ashlanadi...

Har doim boshqalar ranjimasin deya o'zimni xafa qilaman. O'sha boshqalar meni ranjitganlar, azoblaganlar, tilka-pora qilganlar bo'lsa ham, baribir ularga ozor yetmasin deb o'zimni qalqon qilaman.

Qarg'amayman, lekin pok qalbli insonlarning top-toza tuyg'ularini kirlatganlarni Tangri kechirmasin. Sevgani uchun qo'lidan kelganini emas, nafaqat qo'lidan, balki ko'nglidan kelganidan ham ziyodasini qilganlarning barchasini oyoq osti qilganlarni ham Tangri kechirmasin. "Nima qilsam ham, meni telbalarcha sevadi", degan o'yning bergan xotirjamligida tuyg'ular bilan o'ynashganlarni ham Tangri kechirmasin. Qalbidagi muhabbat sabab, hovuchida nima bo'lsa, to'kib-sochganlarni mensimagan insonlarni ham Tangri kechirmasin.