Мавзу: Электромагнит майдон тушунчаси. Электромагнит майдон векторлари Режа

мавзу: Электромагнит майдон тушунчаси. Электромагнит майдон векторлари


Режа

1. 
   Кириш. Электромагнетизм фанининг предмети.
   
2. 
   Электромагнит майдон материянинг алохида тури сифатида. Макроскопик электродинамика. Электродинамиканинг телекоммуникация сохаси илми ва техникасидаги ўрни.
   
3. 
   Куч майдонлари. ЭММ векторлари. Электр майдон кучланганлиги вектори, электр силжиш вектори. Магнит майдон кучланганлиги вектори, магнит индукция вектори.
   

Электромагнетизм назарияси асосида электромагнит майдони тушунчаси ётади. Электромагнит майдон эса материянинг алохида, мухим кўриниши бўлиб, бир-бирини шартли равишда тўлдирувчи ва доимо бирга мавжуд бўлувчи электр ва магнит майдонларининг йиғиндиси хисобланади.

Замонавий телекоммуникация соҳасида радиотехник тизимларнинг ҳиссаси тобора юксалмоқда. Шу билан биргаликда, фойдаланилаётган радиочастота спектрининг юқорироқ тебранишлар сохасига силжиши кузатилмоқда. Масалан, сунъий йўлдошли алоқа тизимлари 4...6 ГГц диапазонининг имкониятларида тўла фойдаланиб, энди 11...14 ГГц частота диапазонига кўчиб ўтган. Коинот станциялари эса 20...30 ГГц диапазонида фаолият юритиш учун катта амалий салохиятга эга.
Сигналларни ташувчи частоталарнинг ошиб бориши унинг ёрдамида кўпсонли каналларни узатиш имконини беради, яъни, фойдаланилаётган диапазон ҳажмини кенгайтиришга таъсир кўрсатади. Шу нуқтаи назардан ҳам 3000 ГГц частотали оптик диапазонининг имкониятлари жуда ҳам юқоридир. Замонавий телекоммуникация соҳасида оптик толали алоқа тизимларининг асосий ўринни эгаллаб бориши хам ана шу омил билан боғлиқ. ОТАТ нинг асосий элементи сифатида қурилмаларни боғловчи кварц толасини эътироф этиш лозим. Аммо, ҳаракатдаги объектлар билан алоқа ўрнатишда ОТАТ асосий алоқа тури сифатида намоён бўла олмайди. Чунки, харакатдаги объект учун эркин тарқалувчи радиотўлқинлардан фойдаланиш қулайроқ. Масалан, уяли алоқа тизимларида 450, 800, 900, 1800, 1900 МГц частота спектрларидан кенг фойдаланилади.
Замонавий телекоммуникация тизимларидан келтирилган мисоллар шуни кўрсатадики, юқори частотали спектрлардан фойдаланиш ривожланувчан йўналишдир. Ўта юқори частотали (шунингдек оптик) техниканинг назарий захираси Максвелл тенгламаларига асосланган ва унда векторли алгебра, векторлар таҳлили элементларидан фойдаланилади.
Эркин фазодаги, ЎЮЧ қурилмаларидаги, хамда узатиш линияларидаги тўлқинли жараёнларни квант физикаси даражасида ўрганиш талаб этилмайди. Уларни чексиз фазодаги узлуксиз майдонлар кўринишида тахлил қилиш етарли. Бундай кузатувни макроскопик кузатув дейилади. Бу каби енгиллаштирилган назарияни эса классик электродинамика дейилади.
Ушбу маърузалар матни электродинамиканинг назарий асосларини қамраб олган ва техник электродинамика соҳасининг бошқа қисмларини ўрганишда назарий захира вазифасини бажаради.