Namangan davlat unuversiteti ingliz tili va adabiyoti kafedrasi

Mavzuning oʻrganilganlik darajasi. Istiqlol sharofati bilan qodiriyshunoslik, fitratshunoslik, choʻlponshunoslik alohida fan tarmoqlari sifatida yuzaga keldi, shakllandi. Bugungi kunda yangi-yangi tadqiqotlar bilan oʻz hadlarini kengaytirib bormoqda. Oybekning dastlabki tadqiqoti “Abdulla Qodiriyning ijodiy yoʻli” ushbu yoʻnalishga tamal toshini qoʻygan edi. Akademik Izzat Sultonning “Yozuvchi Abdulla Qodiriy haqida” “Ulkan adib saboqlari”, “Abdulla Qodiriyning oʻtgan kunlari” asarlari, “Adabiyot nazariyasi” darsligining asosiy fasllari Abdulla Qodiriy ijodi tahliliga bagʻishlangan; akademik Matyoqub Qoʻshjonovning “Abdulla Qodiriyning tasvirlash sanʼati”, “Qodiriy erksizlik qurboni”, Ahmad Aliyevning “Abdulla Qodiriy”, “Ijod va izlanishlar” asarlari, professor Sobir Mirvaliyevning “Abdulla Qodiriy” tadqiqoti, professor Umarali Normatovning “Qodiriy bogʻi”, “Haqiqat taqozosi” badealari, professor Bahodir Karimning “Abdulla Qodiriy: tahlil va talqin” monografiyasi, Habibullo Qodiriyning “Otam haqida”, “Qodiriyning soʻnggi kunlari” asarlari qodiriyshunoslik takomilida fayzli oʻrin tutadi. Shonli istiqlol yillari soʻz sanʼatkorlari shaxsiyati bilan badiiyati, asarlarining yaratilish tarixiga oid adabiy ijod psixologiyasi yangi yoʻnalish sifatida sobit qadamlarini tashladi. Bu borada, ustoz adabiyotshunos Ozod Sharafiddinovning “Choʻlponni anglash” asari, Naim Karimovning “Choʻlpon” maʼrifiy-biografik romani, adabiyotshunos olima Muhabbat Sharafiddinovaning “XX asr oʻzbek nasri jahon adabiyoti kontekstida” monografiyasi, isteʼdodli adabiyotshunos Zamira Qosimovaning rus tilidagi “Milliy va jahon adabiyoti anʼanalari nuqtai nazaridan zamon va inson konsepsiyasi: A. Fitrat, A. Qodiriy, Choʻlpon asarlari misolida” nomli doktorlik dissertatsiyasi, kabilarni taʼkidlash oʻrinli.⁸
Bugungi kun adabiyotshunos olimlari va tanqidchilari oʻzbek adabiyoti rivoji yoʻlida juda samarali mehnat qilmoqdalar. “Sharq Yulduzi”, “Yoshlik”, “Tafakkur”, “Guliston”, “Oʻzbek tili va adabiyoti” kabi adabiy-badiiy, ijtimoiy-siyosiy ruhdagi yetakchi jurnallar, “Kitob dunyosi” gazetasi sahifalarida eʼlon qilinayotgan zamonaviy adabiy jarayonga bagʻishlangan bahs va munozaralar, chop etilayotgan qator maqolalar shundan dalolat beradi.⁹