Normativ-huquqiy hujjatlar: turlari, qabul qilish huquqiga EGA bo‘lgan organlar yoki mansabdor shaxslar, ularni ishlab chiqish va amalga kiritish tartibi Mavzu: Normativ-huquqiy hujjatlar: turlari, qabul qilish huquqiga EGA bo‘lgan organlar yoki mansabdor

Hujjat rasmiy normativ-huquqiy hujjat deb hisoblanishi uchun:
a) “Normativ-huquqiy hujjatlar to‘g‘risida”gi Qonunda belgilangan shaklda qabul qilingan;
b) Umummajburiy davlat ko‘rsatmalari sifatida qonun hujjatlari normalarini belgilash, o‘zgartirish yoki bekor qilishga qaratilgan bo‘lishi shart.
O‘zbekiston Respublikasi Konstitutsiyasining 84-moddasi talabiga ko‘ra, qonun O‘zbekiston Respublikasi Oliy Majlisining Qonunchilik palatasi tomonidan qabul qilinib, O‘zbekiston Respublikasi Oliy Majlisining Senati tomonidan ma’qullanib, O‘zbekiston Respublikasi Prezidenti tomonidan imzolangach hamda qonunda belgilangan tartibda rasmiy nashrlarda e’lon qilingach, yuridik kuchga ega bo‘ladi. Normativ-huquqiy hujjatlar “Normativ-huquqiy hujjatlar to‘g‘risida”gi Qonunning 16-23-moddalariga asosan, normativ-huquqiy hujjatlarga qo‘yiladigan asosiy talablarga binoan qabul qilinishi lozim, ya’ni:
►normativ-huquqiy hujjatlar loyihalarining mazmuniga qo‘yiladigan talablarga asosan tayyorlanishi;
► normativ-huquqiy hujjatni qo‘llash amaliyotini hamda jamoatchilik fikrini o‘rganish;
► normativ-huquqiy hujjatning loyihasini normativ-huquqiy hujjatni qabul qiluvchi organga kiritish;
► normativ-huquqiy hujjatlar loyihalarining ekspertizasini o‘tkazish;
► normativ-huquqiy hujjatning rekvizitiga ega normativ-huquqiy hujjatlar rasmiy matnini imzo qo‘yib tasdiqlash;
► qonunning 22-moddasida nazarda tutilgan hollarda normativ-huquqiy hujjatlarni davlat ro‘yxatidan o‘tkazish;
► yangi normativ-huquqiy hujjat qabul qilinganligi munosabati bilan ilgari qabul qilingan hujjatlarni qayta ko‘rib chiqish talab etiladi.
Normativ-huquqiy hujjatlar, bundan tashqari, qonunning 24-30-moddalarida belgilangan tartibda rasmiy manbalarda e’lon qilinishi, kuchga kirishi shart. Hammaning e’tibori uchun rasman e’lon qilinmagan qonun asosida hech kim sudlanishi, jazoga tortilishi yoki mol-mulkidan mahrum qilinishi mumkin emas. Normativ-huquqiy hujjatlar, agar hujjatlarning o‘zida kechroq muddat ko‘rsatilgan bo‘lmasa, ular rasmiy e’lon qilingan kundan e’tiboran kuchga kiradi. Normativ-huquqiy hujjat, agar uning matnida boshqa izoh berilmagan bo‘lsa, muddatsiz amal qiladi. O‘zbekiston Respublikasining qonunlari, O‘zbekiston Respublikasi Oliy Majlisi palatalarining qarorlari, O‘zbekiston Respublikasi Prezidentining farmonlari e’lon qilinadigan rasmiy manbalar:
“O‘zbekiston Respublikasi Oliy Majlisi palatalarining Axborotnomasi”;
“O‘zbekiston Respublikasi qonun hujjatlarining to‘plami”;
“Xalq so‘zi” va “Narodnoe slovo” gazetalaridir.