Нурободдаги 1-мактаб мукаммал таъмирланмоқда. Унга миллиард сўмдан ортиқ маблағ ажратилди

Нурободдаги 41-мактаб мукаммал таъмирланмоқда. Унга 3 миллиард сўмдан ортиқ маблағ ажратилди

Нуробод туманидаги Нурбулоқ шаҳарчасида жойлашган 41-умумтаълим мактабининг қурилганига қирқ йилдан ошди. 1100 нафар ўқувчи таълим-тарбия олаётган ушбу мактабда ўтган бир неча ўн йил давомида фақатгина жорий таъмирлаш ишлари амалга оширилган, холос. Жорий йил Инқирозга қарши курашиш жамғармаси маблағлари ҳисобидан мактабни мукаммал таъмирлаш учун 3 миллиард 37 миллион сўм маблағ ажратилди.

Қурилиш ишлари “Бахо Ишонч Нурбулоқ" хусусий корхонаси ишчи ходимлари томонидан амалга оширилмоқда. Бугунги кунда мактабдаги таъмирлаш ишларининг 85 фоизи бажарилди. Жумладан, барча дераза ва эшик ромлари янгидан ўрнатилди, том қисми тўлиқ тунука билан қопланди. Мактаб ҳовлиси темир панжара билан ўралди. Янги ҳожатхона қурилди. Айни пайтда спорт зал ва фаоллар залини таъмирлаш, ички пардозлаш ишлари давом этмоқда. Мактабнинг иситиш тизими тўлиқ янгиланмоқда.
Шунингдек, Илҳом Турсунов ҳамда мактаб кузатув кенгаши раиси Нурулло Бекназаровлар томонидан ҳомийлар жалб қилиниб, қарийб 30 миллион сўмлик ҳомийлик маблағлари жамғарилди.
—Мактабимизда мукаммал таъмирлаш ишларининг бошлангани нафақат таълим муассасаси жамоаси, шу билан бирга, “Нурбулоқ” маҳалласи аҳолиси, ота-оналар учун унутилмас хурсандчилик бўлди, — дейди 41-умумтаълим мактаби директори Илҳом Турсунов. — Айни пайтга қадар катта-кичик ҳомийлик ёрдамлари кўрсатилаётгани, ота-оналарнинг мактабга келиб, ишчи ходимлар учун қўй сўйиб, озиқ-овқатидан хабардор бўлиб тургани фикримизни тасдиқлайди. Кузатув кенгашимизнинг раиси Нурулло Бекназаров, маҳалладаги тадбиркорларимиздан Баҳодир Холбоев каби ҳомийлар томонидан мукаммал таъмирлаш жараёнида ўқувчилар учун кенг имкониятлар яратиш, лаборатория хоналарини жиҳозлаш ишлари учун пул маблағлари берилди.
Мактабдаги таъмирлаш ишлари қисқа фурсатларда якунланади. Жорий йилнинг сентябрь ойида бутунлай янгича қиёфа касб этган, таълим-тарбия жараёнлари учун кенг имкониятга эга мактаб фойдаланишга топширилади.