Qaro qoshing, qalam qoshing, Qiyiq qayrilma q

Qaro qoshing, qalam qoshing,
Qiyiq qayrilma qoshing qiz,
Qilur qatlimga qasd qayrab –
Qilich qotil qaroshing, qiz.
Qafasda qalb qushin qiynab,
Qanot qoqmoqqa qo‘ymaysan.
Qarab qo‘ygil qiyo,
Qalbimni qizdirsin quyoshing qiz.
***
Ko‘klamda ko‘karsa ko‘k ko‘katlar,
Ko‘klarga ko‘milsa katta-kattalar,
Ko‘m-ko‘k ko‘karib ko‘rinsa ko‘llar,
Ko‘ngilni ko‘tarsa ko‘rkli gullar.

***
Ruhimda yo‘qoldi qarorim,

Tanimda qolmadi madorim.
Bizlarni bir yo‘qlab kelibsan,
Vafo qilarmisan, bahorim?!
Yoz o‘tdi, kuz o‘tdi, qish o‘tdi,
Boshlardan savdoli ish o‘tdi.
Yurakka izg‘irin - nish o‘tdi,
Vafo qilarmisan, bahorim?!
Yam-yashil qirlarni sog‘indim,
Chechakzor erlarni sog‘indim,
U inja sirlarni sog‘indim,
Vafo qilarmisan, bahorim?!
Lolaning lablari xandadir,
Dog‘i ham tubida – andadir.
O‘xshashi ruh ila tandadir,
Vafo qilarmisan, bahorim?!
Intiqmiz do‘st bilan, yor bilan,
She’r bilan, soz bilan – tor bilan.
Diydorlash bizningdek xor bilan,
Vafo qilarmisan, bahorim?!