Семинар ва профилактик тадбирлар юзасидан маълумот

ТОШКЕНТ ДАВЛАТ ИҚТИСОДИЁТ УНИВЕРСИТЕТИДА “ФАВҚУЛОДДА ВАЗИЯТЛАРНИ ОЛДИНИ ОЛИШ ВА ФУҚАРО МУХОФАЗАСИ ОЙЛИГИ” мавзусида амалий семинар ва профилактик тадбирлар юзасидан маълумот.


Фавқулодда вазиятларни олдини олиш ва уларни бартараф этиш бўйича Хукумат комисияси йиғилишининг 2022 йил 28 февралдаги 3-сонли баёни ва Тошкент шаҳар хокими-Фуқаро муҳофазаси бошлиғининг 2022 йил 19 январъ кунидаги “Тошкент шаҳар аҳолиси ва худудларни фавқулодда вазиятлардан мухофаза қилиш бўйича 2021 йилда бажарилган тадбирлар якуни ва 2022 йилдаги асосий вазифалар тўғрисида”ги 1-сонли буйриғи талабларига асосан, жорий йилнинг 1 апрель – 1 май кунлари “Фавқулодда вазиятларни олдини олиш ва Фуқаро мухофазаси ойлиги” ўтказилиши белгиланган.

Юқоридагиларни инобатга олиб “Фавқулодда вазиятларни олдини олиш ва Фуқаро мухофазаси ойлиги” давомида табиий ва техноген хусусиятли фавқулодда вазиятларнинг олдини олиш бўйича, ахолининг сифатсиз озиқ-овқат маҳсулотлардан захарланиши ва қрим-конго геморрагик иситмаси ва унинг профилактикаси мавзусида барча гурух тьюторлари гурухларга тушинча бериши лозим.

БОТУЛИЗМ ВА ОВҚАТДАН ЗАҲАРЛАНИШДАН ЭҲТИЁТ БЎЛИНГ

Ботулизм касаллиги овқатдан заҳарланишнинг энг оғир тури ҳисобланади. Бу микроб озиқ-овқат маҳсулотларига тушиб, кислородсиз муҳитда кўпаяди ва ўзидан ҳайвон заҳарлари ичидаги энг кучли ҳисобланган токсин (микроб заҳари)ни ажратиб озиқ-овқат маҳсулотларини зарарлаб қўяди ва бу маҳсулотни билмасдан исътемол қилинганда касаллик ривожланади.
Ботулизм касаллигини чақирувчи микроблар кўпинча сабзавотлар, қўзиқорин, гўшт ва балиқ маҳсулотларидан тайёрлаш технологиясига риоя этмасдан уй шароитида тайёрланган, сифатсиз консерва маҳсулотларида кўпайиб, уларни инсон истеъмол қилганида ёки оғзига солганида касаллик ривожланиши мумкин.
Озиқ-овқат маҳсулотларига ботулизм қўзғатувчилари турли йўллар билан ўтади. Macaлан гўштга - ҳайвон сўйилаёгганда, нимталанаётганда, балиқларга эса, тутилаётганда тирналган, жароҳатланган тери қопламаларидан ёки ичакларидан тушиши мумкин. Кўп ҳолларда ботулизм тузланган балиқлардан тарқалади.
Сабзавот, мевалар ва қўзиқоринларга ботулизм қўзғатувчиларини споралари асосан тупроқдан ўтади. Ботулизм қўзғатувчилари ташқи муҳитга ўта чидамли бўлиб, 100 градусда 6 соат, 120 градусда эса 10 дақиқагача тирик бўлади.
Ботулизм споралари қулай шароитга тушиб қолганда, кўпайиб ўзидан токсин ажратиб чиқаради. Спораларни кўпайиши ва ўзидан токсин ажратиб чиқариши учун кислородсиз муҳит қулай ҳисобланади. Шу сабабли, ботулизм қўзғатувчилари консерваланган маҳсулотларда, ветчина, колбаса ва балиқларда яхши ривожланади.
Спораларни ривожланиши учун 22-37 градус даража энг қулай ҳисобланади. 14 градусдан паст даражада, 8 фоизли ош тузи эритмасида ва 55 фоиздан юқори шакарли муҳитда токсин ишлаб чиқариши тўхтайди.