Sh. Rashidov nomidagi samarqand davlat universiteti inson resurslarini boshqarish fakulteti tarmoqlar iqtisodiyoti kafedrasi

KIRISH QISMI – fanning mazmun mohiyati, maqsadi, zazifasi, o’rganish ob’ekti

O’zbekistonda siyosiy va davlat mustaqilligi kamol topishi bilan uning bozor munosabatlariga asoslangan Milliy iqtisodiyoti shakllana boshladi. Milliy iqtisodiyot - bu ma’lum bir davlat hududida tarixan tashkil topgan, bir-biri bilan maqsadi va mehnat taqsimoti bog’liq bo’lgan tarmoqlar yig’indisidir. Yagona tizim sifatida milliy iqtisodiyot o’ziga xos bo’lgan munosabatlari, boshqaruv tizimi, umumiqtisodiy infrastrukturasi va mustaqil qonunchiligiga ega bo’lgan mustaqil davlatchilikni taqozo qiladi.

Jahon (xalqaro) iqtisodiyoti esa bir-biriga o’zaro ta’sir etuvchi, xalqaro aloqalarga intiluvchi barcha milliy iqtisodiyotlar yig’indisidir. Milliy va jahon iqtisodiyotining o’ziga xos xususiyatlari, integratsiyalashuv omillari, tendentsiyalarini iqtisodiy oliy o’quv yurti talabalarining bilishlari maqsadga muvofiqdir. Bakalavr darajasini olayotgan har bir talaba mustaqil davlatning iqtisodiy siyosatini, bozor iqtisodiyotiga o’tishning o’z modelini, uning shakllanish jarayonini bilmog’i lozimdir.
O’zbekiston milliy iqtisodiyoti kursi Oliy o’quv yurtlarining iqtisodiyot yo’nalishlarida o’qiyotgan bakalavr-talabalari uchun mo’ljallangan bo’lib, ularni mamlakat iqtisodiyotida kechayotgan chuqur va ko’p qirrali jarayonlarni o’rganishga undaydi. O’zbekiston milliy iqtisodiyoti kursi O’zbekiston iqtisodiyotining bozor munosabatlariga o’tishi, itisodiyotni isloh qilish jarayonlarini, o’zbek milliy modelining mohiyatini hamda respublika aholisining yuqori turmush darajasiga ega bo’lgan iqtisodiy rivojlangan davlatlar qatoriga bosqichma-bosqich o’tish jarayonlarini o’rganishni o’z oldiga maqsad qilib qo’yadi.
O’zbekiston milliy iqtisodiyoti kursi quyidagi vazifalarni hal qilishga e’tiborni qaratadi: - Mamlakatni ijtimoiy-iqtisodiy qayta qurish va rivojlanishning o’ziga xos yo’llarini va muammolarini o’rganadi.
- Respublikaning iqtisodiy potentsialini, uning tarkibini, o’sish dinamikasini tahlil qiladi.
- Iqtisodiyotni boshqarish vazifalarini va asosiy printsiplarini hamda bozor iqtisodiyoti sharoitida strategik rejalashtirish va davlat tomonidan iqtisodiyotni tartibga solish tizimini o’rganadi.
- Mamlakatni tashqi iqtisodiy faoliyatini tashkil qilish, xorijiy davlatlar bilan iqtisodiy hamkorlik o’rnatish tartibini o’rganadi.
- Globallashuv jarayoni va jahon iqtisodiyotiga integratsiyalashuv shakllari, uning mexanizmlarini o’rganadi va h.k.
O’zbekiston milliy iqtisodiyoti kursi mamlakatimiz iqtisodiyoti, uning iqtisodiy komplekslari, iqtisodiy islohotlar, ularning natijalari, bir-biri bilan bog’liq bo’lgan tarmoqlarini hamda rivojlangan, rivojlanayotgan va o’tish davriga xos bo’lgan davlatlar iqtisodiyotining o’ziga xos bo’lgan xususiyatlarini o’rganishni taqozo qiladi.