Сиддиқ МЎмин беморликда кечган туйғулар пайғамбар ёши

Сиддиқ МЎМИН


БЕМОРЛИКДА КЕЧГАН
ТУЙҒУЛАР


ПАЙҒАМБАР ЁШИ
Қачондан бошланар умрнинг боши,
Не билан ўлчанар инсон бардоши,
Муслимга мезонми пайғамбар ёши? –
Синов ёшларидан ўтаман, болам,
Ҳали юзларга ҳам етаман, болам!

Умр деганларин ҳар они – синов,

Хулоса ясашга шошилма дарров,
Кимдир узоқ яшар, кам яшар биров –
Синов ёшларидан ўтаман, болам,
Ҳали юзларга ҳам етаман, болам!

Бир умр яхшилар этагин тутдим,

Қайғуни унутдим, шодликни кутдим,
Ота ва пайғамбар ёшига етдим. –
Синов ёшларидан ўтаман, болам,
Ҳали юзларга ҳам етаман, болам!

Бошим бир айланиб, ўстиққа тушди,

Ҳолимдан ўғлимнинг эс-хуши учди,
Ука-сингилларим бошимдан қучди –
Синов ёшларидан ўтаман, болам,
Ҳали юзларга ҳам етаман, болам!

Бир одам бемору, минг одам – бедор,

Оқибат синалар такрор ва такрор,
Бундан ҳам гўзалроқ қандай туйғу бор, –
Синов ёшларидан ўтаман, болам,
Ҳали юзларга ҳам етаман, болам!

Ўткир муаммолар қийнаган маҳал,

Ҳаётда баъзида қилдим таваккал,
Умрим ҳам таваккал, ўғлим – Таваккал –
Синов ёшларидан ўтаман, болам,
Ҳали юзларга ҳам етаман, болам!

Бу ёруғ оламда қилар ишим кўп,

Авлодим теграмда бўлади тўп-тўп,
Табассум, қизгинам, кел, юзимдан ўп –
Синов ёшларидан ўтаман, болам,
Ҳали юзларга ҳам етаман, болам!

Бир-бирни синадик шу дард баҳона:

Бегона яқину, яқин – бегона.
Шерозим, тун билан бўлдинг парвона –
Синов ёшларидан ўтаман, болам,
Ҳали юзларга ҳам етаман, болам!

Пайғамбар бурчини бажариб ўтди,

Еттинчи осмонга учди-ю кетди,
Шоир Сиддиқ Мўмин нима ҳам битди? –
Синов ёшларидан ўтаман, болам,
Ҳали юзларга ҳам етаман, болам!..


2019 йил 24-26 июль


М А В З У

Дейдилар: – Ҳар ернинг ўз мавзуси бор:

Бозорда – нарх-наво, масжидда – Худо.
Теша ва аррадан сўйлар дурадгор,
Ошиқ дер: – Ёримдан қилмагин жудо!

Ошпазнинг истаги: қорнинг бўлсин тўқ,

Тадбиркор узунроқ бўлсин дер қўлим.
...Беморхонада-чи, бошқа ҳеч гап йўқ:
Фақат битта мавзу: ҳаёт ва ўлим...
2019 йил 27 июль
С О В Ғ А
Ўғлим ШЕРОЗБЕКка

Бугун беморликдан соғлом уйғондим,

Боқсам, менга қараб кулиб турибсан.
Тангрига шукрона айтдим, қувондим,
Бахтимга ёнимда соғлом турибсан.

Беш кунча беморлик дардини тортдим,

Энди саломатлик қадрин биляпман.
Туғилган кунингга зўр совға топдим –
Соғлом вужудимни олиб келяпман!..


2019 йил
28 июль