Toshkent davlat pedagogika universiteti tabiiy fanlar fakulteti

1.2. Toshkent shahar atrofi sanoatini rivojlantirishning iqtisodiy omillari
Viloyatda ilmiy-texnikaviy salohiyatdan samarali foydalanish tufayli ishlab chiqarish kuchlari bozor iqtisodiyoti talablariga mos ravishda rivojlanib bormoqda. Viloyatda sanoat, qurilish, transport, aloqa, qishloq xo‘jaligi, xususiylashtirish, savdo va tashqi iqtisodiy aloqalar, tadbirkorlik va mehnat bozori, ijtimoiy sohalar ancha rivojlangan.
Moliyaviy ahvol toboro barqarorlashib, makroiqtisodiy ko‘rsatkichlar izchil o‘sib bormoqda. Viloyatda yil davomida olib borilgan ko‘p qirrali maqsadli ishlar o‘z samarasini berdi, yalpi ichki mahsulot 9259,3 mlrd.so‘mga еtib, 2011 yilga nisbatan 105,2 foizga o‘sdi. 2012 yil 1 dekabr holatiga 339 ta xo‘jalik yurituvchi sub’ektlar faoliyatidan 926,7 mlrd.so‘mlik foyda olindi.
Toshkent viloyati respublikamiz hududiy mehnat taqsimotida o‘zining ko‘p tarmoqli iqtisodiyoti bilan ajralib turadi. Viloyat sanoat ishlab chiqarishida mashinasozlik, ko‘mir, elektr energiya, qurilish materiallari, mineral o‘g‘itlar, еngil va oziq-ovqat sanoat mahsulotlarini ishlab chiqarishga ixtisoslashgan. Agroiqtisodiyot tizimida esa paxta, meva va uzum еtishtirish, go‘sht va sut chorvachiligi, shahar atrofi qishloq xo‘jaligi yaxshi rivojlangan. O‘zbekistonda bunday mukammal va murakkab tizimga ega bo‘lgan hududiy ishlab chiqarish majmuasi boshqa mintaqalarda shakllanmagan.
Albatta, har qanday hudud ishlab chiqarish va umuman iqtisodiyotning rivojlanishi eng avvalo kapital qo‘yilmalarga bog‘liq. 2010 yilda jami investitsiya hajmi 1447,7 milliard so‘mni tashkil qilgan. Uning kattaroq qismi Zangiota (15,1 %) va Qibray (7,2 %) tumanlariga hamda Olmaliq (15,3 %) Angren (8,4 %) va Bekobod (7,5 %) shaharlariga tegishli. Mazkur yilda kapital qo‘yilmalarning nisbatan pastroq ko‘rsatkichi Piskent, Bo‘ka, Bekobod va Oqqo‘rg‘on tumanlarida va Ohangaron shahrida kuzatiladi. Qurilish ishlari investitsiya va kapital qo‘yilmalarni amalga tadbiq qilishning asosi hisoblanadi. Bu borada Angren shahri, Qibray, Yuqorichirchiq, Bo‘stonliq, Yangiyo‘l ajralib turadi. Piskent, Quyichirchiq tumanlarida esa ko‘rilayotgan yilda uncha katta qurilish ishlari olib borilmagan.