Ҳурматли директорлар!

Ҳурматли директорлар!
Муассаса ходимлари билан меҳнат муносабатларини ташкил қилинишида Сизнинг маъсулиятингиз катта ҳисобланади. Ходимларга тегишли буйруқларни расмийлаштиришда айрим тавсияларни айтиб ўтмоқчимиз.
Хабаринглар бор, Ўзбекистон Республикаси Президентининг 2021 йил 20 декабрдаги “2022 йилда расмий саналарни нишонлаш даврида қўшимча ишламайдиган кунларни белгилаш ва дам олиш кунларини кўчириш тўғрисида”ги ПФ–35-сонли Фармонига асосан 2022 йилда барча ходимлар учун 5 кунлик қўшимча дам олиш кунлари белгиланган. Ушбу қўшимча дам олиш кунлари ходимларга бериладиган меҳнат таътилларини 5 кунга қисқартириш орқали қопланади. Бунда ходим ўзи учун белгиланган меҳнат таътили кунлари учун тўлиқ таътил пули олади, мисол учун ўқитувчилар 48 кунга, фаррошлар 18 кунга ва ҳ.о. Таътилнинг давомийлиги эса 5 кунга қисқаради, яъни ходим таътилдан 5 кун олдин ишга қайтади ва бу кунлар учун унга табел ёзилмайди.
18 кунга таътилга чиқадиган ходимларнинг таътиллари 3 кунга қисқартирилади, чунки таътил муддати 15 кундан кам бўлмаслиги шарт. Буни албатта эътиборга олинг!!!
Қоровулларнинг таътилини қисқартирманг. Нечи кунга таътил берилса шунча кун дам олишсин. Чунки уларнинг иш вақти график асосида белгиланган. Қўшимча дам олиш кунлари уларга тегишли эмас.
Янги ишга қабул қилинган ва ишга кирганига йил тўлмаган педагогларнинг барчасига 48 кун ҳисобида таътил беринг. Таътил пули эса ишлаган даврига мос равишда ҳисоблаб берилади. Кейин тушунмовчиликлар бўлмаслига учун, буни уларнинг ўзларига тушунтиринг.
Ходимларга таътил беришдан олдин сметангиздаги маблағларни ҳисобга олинг. Таътилга чиқувчилар сони кўпайиб пул етмаслиги натижасида таътил пулларини тўлаб беролмаслик нотўғри ҳисобланади. Шунинг учун пулизни етиш-етмаслигини эътиборга олинг.
Таътил берилишига Сизнинг буйруғингиз асос бўлади. Бир санадан бир хил муддатга таътилга чиқувчилар учун умумий буйруқ ёзманг. Буйруқ ҳар бир ходимга алоҳида-алоҳида, бошқа рақам билан ёзилади. Буйруқда таътилни бошланиши ва тугаши, ишга тушиш вақти, қўшимча дам олиш кунларини қоплаш учун амалда қачон ишга қайтиши кўрсатилиши керак. (Буйруқни ижодий ёндошиб, талаб даражасида чиқарасиз) Буйруққа таътиллар жадвали, МКнинг 133-моддаси, Ўзбекистон Республикаси Президентининг 2021 йил 20 декабрдаги ПФ–35-сонли Фармони асос қилиб кўрсатилади.
Таътилни бошланиши ва тугашини белгилаётганизда Қурбон Ҳайитидаги дам олиш кунини ҳам чиқариб ташлаб ҳисобланг. (Қурбон Ҳайити байрами 10 июл якшанба куни бўлади, Худо хохласа, Президент Фармонида 11 ва 12 июл қўшимча дам олиш куни сифатида белгиланган. Рамазон Ҳайити бир кун олдин бўлганини ҳисобга олсак Қурбон Ҳайити ҳам 9 июлда бўлиши мумкин. Агар шундай бўлса 9 июл шанба, 11 июл душанба иш куни бўлмайди. Ҳар қандай шароитда ҳам 2 кун таътил вақтига кирмайди)
Юқоридаги масалалар бўйича саволлар бўлса бемалол мурожаат қилишингиз мумкин.