Тез тиббий ёрдам хизмати диспетчерининг хатти-ҳаракатлари баённомаси

1.4. ТТЁ хизмати қуйидагиларни амалга оширмайди:

• 
  беморларга кейинги даволанишни (ТТЁ кўрсатилганидан кейин) тайинлаш;
  
• 
  беморларга бошқа соғлиқни сақлаш муассасаларининг шифокор-мутахассислари томонидан тайинланган тиббий ёрдамни кўрсатиш, онкологик касалликларга чалинган беморларга соғлиқни сақлашнинг амбулатория-поликлиника ташкилотлари ишидан ташқари вақтда оғриқсизлантирувчи воситаларни юбориш бундан мустасно;
  
• 
  беморларга меҳнатга лаёқатсизлик варақалари ва (ёки) вақтинча меҳнатга лаёқатсизлик ҳақида маълумотнома бериш;
  
• 
  дори ва наркотик воситаларга, психотроп воситаларга рецептлар ёзиб бериш;
  
• 
  алкогол, гиёҳванд моддалар, психотроп, токсик ёки бошқа маст қилувчи моддалар истеъмол қилинганини ёки мастлик ҳолатини аниқлаш учун тиббий текшириш;
  
• 
  беморларни шифокор маслаҳатига, қабулига ёки текширувга олиб бориш, касалхонадан уйига олиб бориш;
  
• 
  маслаҳатчиларни, касалхоналарнинг хизмат кўрсатувчи ходимларини, тиббий препаратларни ташиш ва етказиб бериш;
  
• 
  мурдаларни транспортировка қилиш, ТТЁ автомобилида ўлиб қолганлардан ташқари.
  

2. ЧАҚИРУВЛАРНИ ҚАБУЛ ҚИЛИШ, РЎЙХАТГА ОЛИШ ВА ТТЁ БРИГАДАЛАРИГА БЕРИШ ТАРТИБИ
2.1. Республика аҳолисига шошилинч, тезкор ва кечиктириб бўлмайдиган тиббий ёрдам бепул ва туну кун кўрсатилади.
2.2. ТТЁ бригадасини чақириш:

• 
  «103» телефони орқали;
  
• 
  Бемор ёки бошқа шахс ТТЁ станциясига келганда ёки ТТЁ бригадасига мурожаат қилганда;
  
• 
  Фавқулодда вазиятлар вазирлиги ва ИИВ тезкор хизматлари билан тўғридан тўғри алоқа линиялари бўйича амалга оширилади. 
  

2.3. ТТЁ бригадаси чақирувини чақирувларни қабул қилиш ва уларни ТТЁ бригадаларига етказиш бўйича ҳамшира (фельдшер) қабул қилади. ТТЁ бригадаси чақирувини ТТЁ хизматининг чақирувларни қабул қилиш бўйича фельдшери телефон орқали қабул қилганда, бир вақтнинг ўзида телефондаги сўзлашув автоматик тарзда ёзиб олинади ва ТТЁ хизматида 60 кун сақланади.
2.4. Тез ёрдам бригадасини чақирувчи диспетчерга қуйидагиларни маълум қилиши лозим:

• 
  чақирув сабабини;
  
• 
  беморнинг фамилияси, исми, отаси исмини, ёшини;
  
• 
  аниқ манзилни (кўча номи, уй, подъезд, қават, уй телефони рақами, подъезд эшиги коди) ва мўлжални.
  

Ҳар бир ҳолатда диспетчернинг саволларига мумкин қадар аниқ жавоб бериш керак – бурро ва лўнда сўзлашув чақирувни қабул қилиш ва компьютерда ишлов беришни тезлаштиради, касаллик ихтисосига мос бригаданинг келишини таъминлайди.
2.5.  Имкон қадар, тез ёрдамни чақирган фуқаролар тез тиббий ёрдам бригадасини кўчада, ҳовлида, подъедда ёки телефон орқали суҳбатлашганда тайинланган бошқа жойда кутиб олиши керак. Хавфли уй ҳайвонлари алоҳида ажратиб қўйилган бўлиши лозим.
2.6. ТТЁ хизмати чақирувларини қабул қилиш бўйича ҳамшира (Фельдшер) ТТЁ бригадасига чақирувни қабул қилганда:

• 
  ТТЁ бригадаси чақирувини дарҳол электрон ва (ёки) қоғоз ташувчида белгиланган тартибда рўйхатга олади (кейинги ўринларда – рўйхатга олиш деб аталади);
  
• 
  ТТЁ бригадаси чақируви устуворлигини аниқлайди;
  
• 
  Чақирувни ТТЁ бригадаларига чақирув устуворлигига қараб белгиланган вақт давомида етказади.