Xalqaro biznes va texnologiyalar uyushmasi tashkil etildi

KICHIK BIZNES VA INNOVATSION TEXNOLOGIYALAR

Tadbirkorlar va ishbilarmonlar harakati – O‘zbekiston Liberal-demokratik partiyasi Sirdaryo viloyati kengashi tomonidan “Innovatsion texnologiyalar – kichik va oilaviy biznesni rivojlantirish uchun imkoniyatlar” mavzusida o‘quv- seminari o‘tkazildi. 

Viloyat hokimi o‘rinbosari, xotin-qizlar qo‘mitasi raisi D.O‘rolova va boshqalar mamlakatimizda kichik biznes va xususiy tadbirkorlikni rivojlantirish orqali aholi farovonligini yuksaltirish, xotin-qizlar va yoshlar bandligini ta’minlash, oilalar daromadini oshirishga alohida e’tibor qaratilayotganini ta’kidladi. 

Prezidentimizning 2016-yil 5-oktabrdagi “Tadbirkorlik faoliyatining jadal rivojlanishini ta’minlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qo‘shimcha chora-tadbirlar to‘g‘risida”gi farmoni bu borada muhim dasturilamal bo‘lmoqda. 

Seminarda innovatsiyalarning ahamiyati, kichik biznes sohasida innovatsion faoliyatni davlat tomonidan tartibga solish, kichik biznes subyektlarining mahsulot ishlab chiqarish va qayta ishlash, xizmat ko‘rsatish borasidagi tajribalarini ommalashtirish xususida fikr almashildi. 

Oilaviy tadbirkorlikka innovatsion texnologiyalarni joriy etish, bu borada ularning tashabbus va intilishlarini qo‘llab-quvvatlash, oilaviy subyektlarning mahsulot ishlab chiqarish va aholiga xizmat ko‘rsatish bo‘yicha faoliyati yuzasidan ma’ruzalar tinglandi.