1-amaliy mashgʻulot

2-§. Metrologik nazorat natijalarini II sxema bo‘yicha e’tirof etish
36. Metrologik nazorat natijalarini e’tirof etish metrologik nazorat natijalarini o‘zaro e’tirof etish to‘g‘risida ikki tomonlama hukumatlararo (idoralararo) bitimlar mavjud bo‘lgan taqdirda amalga oshiriladi.
37. Quyidagilar o‘lchov vositalarini, sinov vositalarini, standart namunalarni va o‘lchovlarni bajarish metodikalarini metrologik nazorat qilish natijalarini e’tirof etish shartlari hisoblanadi:
metrologik nazorat akkreditatsiya qilingan laboratoriyalar (markazlar) yoki ishlab chiqaruvchi mamlakatning ishlarning ushbu turlarini o‘tkazishga vakolatli bo‘lgan organlari tomonidan o‘tkazilishi;
o‘lchov vositalarini va standart namunalarning xalqaro etalonlargacha izchilligini ta’minlash;
o‘lchov vositalari, sinov vositalari, standart namunalar va o‘lchovlarni bajarish metodikalarining O‘zbekiston Respublikasida amalda bo‘lgan normativ hujjatlar talablariga hamda ishlab chiqaruvchining foydalanish hujjatlariga muvofiqligi;
O‘zbekiston Respublikasida ularning metrologik nazoratini o‘tkazish mavjud bo‘lmagan holatlarda ariza beruvchining o‘lchov vositalari, sinov vositalari, standart namunalarning keyingi (davriy) metrologik nazoratini ta’minlash bo‘yicha majburiyatlari.
38. Ariza beruvchi vakolatli organga o‘lchov vositalarini, sinov vositalarini, standart namunalarni va o‘lchovlarni bajarish metodikalarini metrologik nazorat qilish natijalarini e’tirof etish yuzasidan ushbu Nizomga 8-ilovaga muvofiq shakl bo‘yicha buyurtmanoma taqdim etadi, unga quyidagi hujjatlarni ilova qiladi:
metrologik nazorat natijalarini tasdiqlovchi hujjatning asl nusxasi yoki uning ishlab chiqaruvchi mamlakatning metrologiya bo‘yicha milliy organi tomonidan tasdiqlangan nusxasi;
metrologik nazoratni o‘tkazish usullarini va/yoki metodikasini reglamentlovchi hujjatlarning hamda o‘lchov vositalari, sinov vositalari va standart namunalardan foydalanish qoidalarining nusxasi;
o‘lchovlarni bajarish metodikalarining asl nusxasi yoki ularning asl nusxasini saqlovchining muhri bilan tasdiqlangan nusxasi;
o‘lchov vositalarini, sinov vositalarini, standart namunalarni va o‘lchovlarni bajarish metodikalarining metrologik nazoratini o‘tkazgan organning akkreditatsiya qilinganligini yoki vakolatini tasdiqlovchi hujjatning akkreditatsiya qilingan organ yoki ishlab chiqaruvchi mamlakatning metrologiya bo‘yicha milliy organi tomonidan tasdiqlangan nusxasi.
39. Vakolatli organ buyurtmanomani ko‘rib chiqadi va taqdim etilgan hujjatlarni tahlil qiladi. Ularning natijalari bo‘yicha 3 ish kuni mobaynida e’tirof etish to‘g‘risida qaror qabul qiladi yoki e’tirof etishni rasman asoslangan holda rad etadi.
40. O‘lchov vositalarining metrologik nazorati va navbatdan tashqari tekshiruvi natijalarini e’tirof etish sertifikatini rasmiylashtirish ushbu Nizomning 32 — 35-bandlarida belgilangan tartibda amalga oshiriladi.