1-mavzu. O’quv-tarbiya jarayonida o’qitishning texnik vositalari va o’qituvchining kompetentliligi hamda ulardan foydalanish. Kirish

Fan bo’yicha talabalarning bilim, ko’nikma va malakasiga qo’yiladigan talablar
Fanni o’zlashtirish jarayonida amalga oshiriladigan masalalar doirasida talaba:

- zamonaviy o’quv texnik vositalar, ularning ishlash prinsiplari, zamonaviy o’quv texnik vositalarining turlari, kasbga oid fanlarni oliy ta’lim, o’rta maxsus ta’lim muassasalarida zamonaviy o’quv texnik vositalar asosida o’qitishning asosiy prinsiplari va xususiyatlari to’g’risidagi bilimlarga ega bo’lishi;

- mutaxassislik fanlarini zamonaviy o’quv texnik vositalar yordamida o’qitish prinsiplari, o’quv jarayonini zamonaviy o’quv texnik vositalari asosida tashkil etish, ta’lim oluvchilarning diqqatini jalb qilish va mashg’ulot samaradorligini to’la oshirish metodlari amalda qo’llash ko`nikmalariga ega bo’lishi;.

- zamonaviy o’quv texnik vositalari yordamida o’quv-tarbiya jarayonini tashkil etish va o’quv-metodik materiallarini ishlab chiqish malakalariga ega bo’lishi lozim.

Texnologiyaning rivojlanishi bilan texnik vositalardan foydalanib o’qitish uchun birgina kompyuterning mavjudligi kifoya bo’lib qoldi. Avvallari televizor, videomagnitofon, kinoproyektor, diaproyektor va boshqalar bajargan funksiyalarni kompyuter muvaffaqiyat bilan o’z zimmasiga oldi. Qolaversa, axborotni uzatish, saqlash, tasvirlash sifati sezilarli darajada ortdi.

Hozirgi kunga kelib, kompyuter savodxonligi madaniyatning muhim belgisiga aylanib ulgurdi, kelajakda esa u har bir insonga qayerda, qaysi uchastkada ishlamasin zaruratga aylanadi. Demak, kompyuter ishi, kompyuterdan foydalanishga o’rgatish eng yaqin vaqt ichida umumiy ishga aylanishi shubhasiz.

Zamonaviy axborot texnologiyalarining vositalari qatoriga: kompyuter, skaner, videoko’z, videokamera, LCD proyektor, interaktiv elektron doska, faks modem, telefon, elektron pochta, multimedia vositalari, Internet va Intranet tarmoqalari, mobil aloqa tizimlari, ma’lumotlar omborini boshqarish tizimlari, sun’iy intelekt tizimlarini kiritish mumkin.