Ixtisoslashtirilgan davlat umumta'lim muassasalari faoliyati takomillashtirish masalalari. O‘zbekiston Respublikasi Vazirlar Mahkamasining 019-yil 30-sentabrdagi 822-sonli qarori bilan 2008-yil 7-avgustdagi “Ayrim fanlar chuqur o‘rganiladigan davlat ixtisoslashtirilgan umumta'lim muassasalari faoliyatini takomillashtirish to‘g‘risida”gi qaroriga qo‘shimcha va o‘zgartirishlar kiritildi. Bu haqda Xalq ta'limi vazirligi matbuot xizmati xabar qiladi. Unga ko‘ra, endilikda ayrim fanlar chuqur o‘rganiladigan ixtisoslashtirilgan davlat umumta'lim muassasalari faoliyatini belgilashga doir quyidagi qo‘shimcha va o‘zgartirishlar kiritildi.
11 yillik majburiy umumiy o‘rta ta'lim tizimiga o‘tilishi munosabati bilan hamda xalqaro tajribalarni inobatga olib, ixtisoslashtirilgan davlat umumta'lim maktablariga iqtidorli o‘quvchilar qabuli 5-sinfdan (avvallari 2-sinfdan), ixtisoslashtirilgan davlat umumta'lim maktab-internatlariga ham iqtidorli o‘quvchilar qabuli 7-sinfdan (avvallari 5-sinfdan) boshlanadi.
Ixtisoslashtirilgan ta'lim muassasalariga qabul bir bosqichli - sinov (avvallari pedagogik-psixologik diagnostika va sinov) asosida qabul qilish tartibi belgilandi.
Shuningdek, ixtisoslashtirilgan ta'lim muassasalariga qabul uchun o‘tkaziladigan tanlovlar shakliga aniqlik (test asosida) kiritildi, (avvallari og‘zaki va yozma shaklda bo‘lgan).
Qabul jarayonlarining shaffofligini ta'minlash maqsadida ixtisoslashtirilgan davlat umumta'lim maktablarining 5-sinfiga qabul Davlat test markazi tomonidan o‘tkazilishi (avval 2-sinfga maktab qoshida tuzilgan Komissiya tomonidan o‘tkazilgan) belgilandi.
Iqtidorli o‘quvchilarni qo‘llab-quvvatlash va ularga qo‘shimcha imtiyozlar belgilash maqsadida Prezident maktablariga saralash tanlovlarida qatnashib, ajratilgan qabul kvotasidan keyingi eng yuqori natija ko‘rsatgan o‘quvchilar orasidan ballar ketma-ketligi asosida ixtisoslashtirilgan davlat umumta'lim maktablarining 5-sinfiga va maktab-internatlarining 7-sinfiga qo‘shimcha qabul kvotasi doirasida o‘quvchilar saralash test sinovlari o‘tkazilmasdan qabul qilinishi (avvallari bunday tartib bo‘lmagan) belgilandi.
Ixtisoslashtrilgan davlat umumta'lim muassasalariga qabul kvotasini shakllantirish tartibi belgilanib, endilikda O‘zbekiston Respublikasi Xalq ta'limi vazirligi Vazirlar Mahkamasi huzuridagi Davlat test markazi bilan birgalikda ixtisoslashtirilgan umumta'lim muassasalarining qabul kvotasini belgilaydi. (avvallari qabul kvotasini belgilash tartibi nazarda tutilmagan)
Ixtisoslashtirilgan davlat umumta'lim mussasalarida ta'lim sifatini oshirish va sog‘lom raqobat muhitini yaratish maqsadida o‘quvchining reyting va akademik o‘zlashtirishida tizimli pasayish yuz berganda, ushbu o‘quvchini o‘quvchilar safidan chiqarish to‘g‘risida taqdimnomani tegishli voyaga yetmaganlar ishlari bo‘yicha idoralararo komissiyalariga kiritish vakolati berildi. (avvallari bunday tartib mavjud bo‘lmagan)
11 yillik umumiy majburiy ta'lim tizimiga o‘tilishi munosabati bilan hamda iqtidorli o‘quvchilarning ma'lumoti darajasi oshishiga, samarali tayyorlanishiga, oliy ta'lim muassasalariga (avvallari 9 yillik ta'limda akademik litseylar va kasb-hunar kollejlariga yo‘naltirilgan) kirishiga yordam beradigan shart-sharoitlar yaratish ixtisoslashtirilgan ta'lim muassasasining asosiy funksiyalaridan biri etib belgilandi.
Endilikda ixtisoslashtirilgan davlat umumta'lim muassasalarida ham boshqaruv tizimining shaffofligini ta'minlash, korporativ boshqaruv, jamoatchilik nazoratini ko‘chaytirish maqsadida Kuzatuv kengashlari (avvallari Vasiylik kengashi) faoliyati yo‘lga qo‘yiladigan bo‘ldi.
Ixtisoslashtirilgan sinflar va ixtisoslashtirilgan umumta'lim muassasalari faoliyatini, shuningdek, o‘quv-tarbiya jarayoni sifatini o‘rganish va baholash O‘zbekiston Respublikasi Xalq ta'limi vazirligi va Vazirlar Mahkamasi huzuridagi Ta'lim sifatini nazorat qilish davlat inspeksiyasi (avvallari bu vakolat Davlat test markaziga berilgan) tomonidan belgilanadigan tartibda amalga oshiriladi.
