8-Мавзу: Ўзбекистон Республикасидаги ижтимоий ўзгаришлар. Режа

4. Ўзбекистон шароитида давлат ижтимоий сиёсат концепциясининг ишлаб чиқилиши ва амалга оширилиши.
2017 йилдан сўнг ҳам Ижтимоий соҳага муҳим эътибор давлат сиёсатининг устувор йўналишларидан бирига айланди. Зеро, Ўзбекистон Республикаси Президенти томонидан 2017 йилда қабул қилинган 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясининг тўртинчи йўналишида айнан ижтимоий соҳани ривожлантириш кўзда тутилган. У қуйидагича баён этилган: “Ижтимоий соҳани ривожлантиришга йўналтирилган аҳоли бандлиги ва реал даромадларини изчил ошириб бориш, ижтимоий ҳимояси ва соғлиғини сақлаш тизимини такомиллаштириш, хотин-қизларнинг ижтимоий-сиёсий фаоллигини ошириш, арзон уй-жойлар барпо этиш, йўл-транспорт, муҳандислик-коммуникация ва ижтимоий инфратузилмаларни ривожлантириш ҳамда модернизация қилиш бўйича мақсадли дастурларни амалга ошириш, таълим, маданият, илм-фан, адабиёт, санъат ва спорт соҳаларини ривожлантириш, ёшларга оид давлат сиёсатини такомиллаштириш”. 2017 йилнинг айнан “Халқ билан мулоқот ва инсон манфаатлари йили” деб номланиши амалда давлат сиёсатининг изчиллигидан далолат беради.
Ижтимоий соҳани ривожлантиришнинг устувор йўналишлари бўйича 2020 йилги Давлат дастури доирасида Ўзбекистон Республикаси Президентининг 1 та Фармони ва 5 та Қарори қабул қилинди. Шунингдек, 12 тачора-тадбирлар дастури ишлаб чиқилиб, тегишли тартибда тасдиқланди ҳамда Вазирлар Маҳкамасининг 2 та қарори ва 1 та идоралараро норматив ҳужжати қабул қилинди. Хотин-қизларнинг ижтимоий-сиёсий фаоллигини ошириш мақсадида 4 404 нафар хотин-қиз тадбиркорлик соҳаларига жалб этилди. Хотин-қизлардан 1 448 нафарининг ҳунармандчилик, 301 нафарининг касаначилик соҳаларидаги ташаббуслари қўллаб-қувватланди. Қолаверса, 426 нафар хотин-қизга мазкур мақсадларни амалга оширишини рағбатлантириш мақсадида банклар томонидан жами 58 млрд. Сўмдан ортиқ кредитлар ажратилишига кўмаклашилди.
2021 йил 17 февраль куни президент «2021−2030 йилларда Ўзбекистон Республикаси аҳолисини ижтимоий ҳимоя қилиш тизимини такомиллаштириш чора-тадбирлари тўғрисида"ги фармойишни имзолади ва у билан аҳолини ижтимоий ҳимоя қилиш Миллий стратегияси концепцияси тасдиқланди. 2020 йилда ижтимоий ҳимоя билан шуғулланувчи давлат органлари рўйхати Маҳалла ва оилани қўллаб-қувватлаш вазирлиги ва Ëшлар ишлари агентлиги билан тўлдирилди. Маҳалла ва оилани қўллаб-қувватлаш вазирлигининг ваколати ижтимоий ёрдамга муҳтож оила ва болаларни аниқлаш, ижтимоий нафақа олувчиларни маҳалла даражасида рўйхатга олиш ва ҳисоблашдан иборат.