Abdulla qodiriy nomli jizzax davlat pedagogika instituti fizika-matematika fakulteti

XULOSA

Biz matematika darslarining barcha bosqichlarida pedagogik va axborot texnologiyalari albatta qo’llanilishi kerak degan fikrdan uzoqdamiz. Lekin shu bilan birga matematik bilimlarni berishda mazkur texnologiyalarni qo’llash imkoniyatlari juda katta. Ulardan turli maqsadlarda: mantiqiy og’zaki va yozma nutqni shakllantirishda, tanqidiy fikrlashga o’rgatishda, xotirani mustahkamlashda, olinayotgan bilimlarni tahlil qilish asosida, mustaqil o’z fikriga ega bo’lishga o’rgatishda va hakozolarda qo’llash nafaqat o’quvchilarning dars davomidagi faolligini oshiradi, balki o’z kuchiga ishonch, matematika faniga qiziqish uyg’otadi.
Ushbu bitiruv malakaviy ishi bo’yicha o’tkazilgan tadqiqot natijalari tahlili bo’yicha umumiy o'rta ta'lim maktablarida matematika o’qitish jarayonida qo’llaniladigan YaPT lar asosidagi darslarning quyidagi afzalliklari mavjud ekanligi aniqlanadi:

1. 
   Ta’lim olish va o’yin faoliyati uyg’unlashgan darslarda o’quvchilarning bilish faoliyati faollashadi, ularda tasavvur, kuzatuvchanlik, topqirlik rivojlantiriladi, o’quvchilar tez va mantiqan fikrlashga yo’naltiriladi.
   
2. 
   Mazkur darslarda o’quvchilar avval o’zlashtirgan bilim, ko’nikma va malakalari yordamida yangi bilimlarni mustaqil ravishda o’zlashtiradilar.
   
3. 
   YaPT asosidagi darslar o’quvchilar o’rtasida o’zaro yordam, do’stona munozara hosil bo’lishiga olib keladi. Bundan o’quvchilar jamoasi yanada mustahkamlanadi.
   
4. 
   O’quvchilar YaPT asosidagi darslarga katta qiziqish blain tayyorgarlik ko’radilar, natijada yangi bilimlarni o’zlashtirish samaradorligi, sifati yuqori bo’ladi.
   
5. 
   YaPT asosidagi darslar o’quvchilarning kasb tanlashda o’z kuchini, bilimini, iqtidorini sinab ko’rishda, ularni hayotga tayyorlashda muhim ahamiyatga ega bo’ladi.
   
6. 
   O’quvchilarning nutq madaniyati, o’z fikrlarini lo’nda va mantiqan bayon etish, ularni dalillash ko’nikmalari rivojlantiriladi.
   
7. 
   O’quvchilarning bilimidagi mavhum tushunchalar aniqlanadi, ularga barham beriladi, bilim olishga bo’lgan intilishlari rivojlantiriladi.
   
8. 
   O’z o’rtog’ining fikrlarini sabot va chidam bilan tinglash, bilimini nazorat qilish va uni baholash ko’nikmalari hosil qilinadi, o’quvchilar o’rtasida o’zaro hamkorlik va yordam vujudga keladi.
   

Xulosa qilib aytganda, o’quv materiallarini loyihalashga pedagogik texnologiyalari asosida yondashish ta’lim jarayonida o’quvchilarning bilish faolligini ta’minlashga, o’zlashtirish sifatini oshirishga yordam beradi va o’quv jarayonining samaradorligini kafolatlaydi. O’quvchilarning dars davomida mavzularda yoritilgan o’quv materiallarini anglashga, ular orasidagi mantiqiy munosabatlarni aniqlashga, mustaqil fikrlashga, mantiqiy tafakkurni rivojlantirishga, ilmiy dunyoqarashni kengayishiga, bilimlarni tushunib o’zlashtirish orqali uzoq muddat esda saqlab qolishlariga keng imkoniyatlar yaratadi.