Асосий конституциявий янгиликларнинг мазмуни ва моҳияти

4.6. Фуқароларнинг экологик ҳуқуқларини ҳимоя қилиш ва таъминлашга қаратилган махсус нормаларни конституциявий мустаҳкамланиши.
Киритилаётган тузатишлар:
– Конституцияда илк маротаба қуйидагилар мустаҳкамланмоқда:
а) Ўзбекистон халқининг ҳозирги ва келажак авлодлар учун мамлакатимизнинг бебаҳо табиий бойликлари ва соғлом атроф-муҳитни асраб-авайлаш ва кўпайтиришга астойдил аҳд қилганлиги (Муқаддима);
б) ҳар кимнинг қулай атроф-муҳит ва унинг ҳолати тўғрисида ҳаққоний ахборотга бўлган ҳуқуқи (49-модда);
в) давлат барқарор ривожланиш принципига мувофиқ атроф-муҳитни яхшилаш, тиклаш ва муҳофаза қилиш, экологик мувозанатни сақлаш; давлат Оролбўйи минтақасининг экологик тизимини муҳофаза қилиш ҳамда тиклаш, минтақани ижтимоий ва иқтисодий жиҳатдан ривожлантириш юзасидан чоралар кўриши (49-модда);
Оролбўйи минтақасидаги глобал экологик муаммо 50 млнга яқин аҳолининг турмуш тарзига бевосита салбий таъсирини ўтказмоқда.
Ушбу норманинг Конституцияда мустаҳкамланиши Оролбўйи минтақаси аҳолиси учун муносиб яшаш шароитларини яратишга, фуқаролар, биринчи навбатда, ижтимоий соҳа вакиллари учун қўшимча имтиёзлар тўпламидан фойдаланишга имкон беради, атроф-муҳитни муҳофаза қилишга қаратилган турли лойиҳаларда бизнес тузилмалари ва нотижорат ташкилотларнинг фаол иштирок этиш имкониятини оширади.
– атроф-муҳитни муҳофаза қилиш, табиий бойликларни
ва биологик хилма-хилликни сақлаб қолиш, иқлим ўзгаришларига, эпидемиялар, пандемияларга қарши курашиш ҳамда уларнинг оқибатларини юмшатиш соҳасида ягона давлат сиёсати амалга оширилишини таъминлаш Вазирлар Маҳкамасининг асосий вазифаларидан бири этиб белгиланган
(116-модда);
– ҳудудларнинг экологик жиҳатдан ривожланишини таъминлашга қаратилган чора-тадбирларни амалга ошириш вилоятлар, туманлар, шаҳарлар ҳокимларининг ваколатлари этиб белгиланди (123-модда).