Avtomatlashtirish tizimlarini loyihalash

22.4.4.2. Me’yordagi to‘xtatish
Umumiy mulohazalar
«Me’yordagi to‘xtatish» mashqidan maqsad – issiqlik almashtirgichni to‘g‘ri va xavfsiz o‘chirish uchun zarur harakatlar ketma-ketligini bilib olish.
Isitish uzelini to‘la to‘xtatish odatda asosiy qurilmani ta’mirlashdan o‘tkazish uchun yoki ishlab chiqarish zaruriyatiga ko‘ra amalga oshiriladi.
Tadbir

1. 
   Issiqlik eltgichni (issiq suyuqlikni) uzatish nasosi N-2A ni to‘xtating.
   
2. 
   FIRC-110 issiqlik eltgich rostlagichini dastaki rejimga o‘tkazing. Issiqlik eltgich oqimi nolga tushib qolganda, FV-110 klapanni berkiting. Bunda issiqlik almashtirgichni sovitish uchun mahsulot uzatishni davom ettiring.
   
3. 
   Maxsulotni sarflash rostlagichi FIRC-100 ni dastaki rejimga o‘tkazing. T-1 dan chiqishda qizigan mahsulotning harorati (TIRC-330 ning ko‘rsatishi) T-1 ga kirishdagi mahsulot haroratiga yaqin bo‘lsa (TIR-300 ning ko‘rsatishi), u holda N-1A nasosni to‘xtating va FV-100 klapanni berkiting.
   
4. 
   Issiqlik almashtirgichning barcha kirish va chiqish quvurlaridagi HV-001, HV-002, HV-003, HV-004 ajratkichlarni berkiting.
   

Isitish uzeli to‘xtatildi va texnik xizmat ko‘rsatilishi uchun yoki asbob-uskunani ta’mirlash uchun tayyor. Issiqlik almashtirgichni ta’mirlashga tayyorlash operasiyalari (korpusni drenaj qilish, quvurlar dastasini havo bosimi bilan tozalash va hokazo) modellashtirilmaydi. Real qurilmada ular korxonada amalda bo‘lgan yo‘riqnomalarga muvofiq bajarilishi kerak.


22.5-§. SIG‘IMLAR TIZIMI


22.5.1. Texnologik uzelning tavsifi
Ikki idishdan iborat tizim modellashtiriladi, ular orasidan ishchi suyuqlik o‘z-o‘zidan oqib o‘tadi (22.5-rasmga qarang). Bu tizim gidrostatika prinsiplarini namoyish qilishga imkon beradi. Idishlar har xil balandlikka o‘rnatilgan. Idishlar orasidagi oqim yo‘llarida ishchi suyuqlikning sarfini o‘zgartirish uchun idishlardagi bosimni va sathlarni o‘zgartirish mumkin.
Ishchi suyuqlik sifatida suvdan foydalaniladi.



22.5-rasm. Idishlar tizimi sxemasi