Buyuk Fiziklar: futbolchi,tennischi,baliqchi,dengizchi,alpinist

Mendeleev tasviriy san’atning bilimdoni va muxlisi ham bo‘lgan.
***
Nemis fiziklaridan Ernst Xlodni butun bo‘sh vaqtini ixtirochilikka bag‘ishlagan. Maks Laue uchun avtomobil haydashdan ham sevimliroq mashg‘ulot yo‘q edi, hatto birovning mashinasida ketayotgan bo‘lsa ham, aqalli birpas haydamasa, ko‘ngli sira ham o‘rniga tushmasdi. Atoqli fizik va kimyogar, struktura nazariyasining asoschilaridan biri A.Kekuls esa arxitekturaga ishqiboz bo‘lib, molekula tuzilishida ham shu xil go‘zallik, uyg‘unlikni izlardi.
***

Frantsuz fizigi Pol Lanjevan bir qultum ichganidayoq har qanday vinoning markasini, qancha yil saqlanganini, hatto u tayyorlangan uzumning navidan tortib, qaerda o‘sganigacha bexato aytib bera olardi.

***
Ingliz fizigi Pol Dirak, amerikalik fizik Irvin Lengmyur, akademik Igor Tamm ashaddiy alpinistlardan edi. Ota izidan borgan fizik Ye.Tamm alpinistlarning Himolay ekspeditsiyasiga boshchilik qilgan.Nemis fizigi Maks Plank qarigan chog‘ida ham tog‘larni tark etmagan. 80 yoshda Tatra tog‘laridagi Katta Venetsian cho‘qqisiga ko‘tarilgan. Yana bir ashaddiy alpinist — Moskva davlat universitetining sobiq rektori, akademik R.V.Xoxlov esa Pomir tog‘larini zabt etish paytida vafot etgan.
***
Frantsuz faylasufi, matematigi, fizigi, fiziologi Dekart bilan amerikalik fizik Albert Maykolson qilichbozlik muxlisi bo‘lishgan.
Amerikalik fizik Artur Kompton, ingliz fiziklaridan Jozef Tomson bilan Ernest Rezerford tennisga qiziqishar, bu sohada ham ularga uncha-muncha odam bas kela olmasdi.
***
Olimlarimiz orasida ham xilma-xil kasb va hunar ishqibozlarini uchratish mumkin. Masalan, el-yurtga yaxshi tanish bo‘lgan davrimiz allomalaridan bir nechasini misol keltiraylik. Harakatchan bo‘lishni talab qiluvchi tennis o‘yini ko‘p olimlarimizni o‘ziga rom etgan. Fanlar akademiyasining fizika — texnika instituti rektori Sodiq Azimov ham tennis o‘yini shaydosi edi.
Akademik Muxtor Saidov durustgina mashshoq ekanligidan tashqari mohir tennischi ham bo‘lgan. 1983 yili Ukrainaning poytaxti Kiev shahrida bo‘lib o‘tgan akademiklar va muxbir a’zolar o‘rtasidagi musobaqada shaxsiy hisobda u 2-o‘rinni egallab, kumush medalga sazovor bo‘lgandi.
Fizik, akademik olim Ubay Orif esa respublika tennis federatsiyasining raisi bo‘lgan, hatto boshlovchi tennischilar uchun qo‘llanma sifatida kitob ham yozgan.
O‘zbek fiziklaridan yana biri —  fizika-matematika fanlari doktori, professor, akademik Muhammad O‘rozboev she’rlar yozganini kim bilmaydi, deysiz.

Tekshirdi:Usmonova Shoira

Bajardi:Dilshod Zokirov