Davlat pensiya ta’minotini boshqarish organlari, ularning guruhlanishi

Budjetdan tashqari Pensiya jamg’armasining vakolatlari, asosiy vazifalari

Budjetdan tashqari Pensiya jamg’armasining vakolatlari O’zbekiston Respublikasi budjet Kodeksi bilan belgilab berilgan. Kodeksning 33-moddasiga ko’ra, Moliya vazirligi huzuridagi budjetdan tashqari Pensiya jamg’armasi pul mablag’lari fondi shaklidagi pensiya jamg’armasining tasarruf etuvchisi

hisoblanadi. Fond mablag’larining tasarruf etuvchisi sifatidagi Pensiya jamg’armasining vakolatlari quyidagilardan iborat:

• 
  Pensiya jamg’armasi budjetining loyihasini tayyorlaydi va O’zbekiston Respublikasi Moliya vazirligiga kiritadi;
  
• 
  Pensiya jamg’armasi mablag’lari bo’yicha xarajatlar smetalarini, shuningdek ularga kiritilgan o’zgartirishlarni ro’yxatdan o’tkazadi;
  
• 
  Pensiya jamg’armasi budjeti daromadlari prognozini davlat soliq xizmati organlari va bojxona organlariga yilning har choragida etkazadi;
  
• 
  Pensiya jamg’armasi budjetiga o’zgartirishlar kiritish bo’yicha takliflar tayyorlaydi va O’zbekiston Respublikasi Vazirlar Mahkamasiga kiritadi;
  
• 
  Pensiya jamg’armasiga majburiy to’lovlar va boshqa tushumlar to’liq hamda o’z vaqtida tushishi ustidan monitoringni amalga oshiradi;
  
• 
  Pensiya jamg’armasi budjetining tegishli davrdagi ijrosi to’g’risidagi hisobotlarni O’zbekiston Respublikasi Moliya vazirligiga taqdim etadi;
  
• 
  jamg’arma mablag’laridan maqsadli foydalanilishi ustidan nazoratni amalga oshiradi;
  
• 
  jamg’arma budjetini ijro etish jarayonida tushumlarni ko’paytirish bo’yicha qo’shimcha zaxiralarni aniqlaydi;
  
• 
  jamg’arma xarajatlarini maqbullashtirishni amalga oshiradi;
  
• 
  jamg’armaning Yagona g’azna hisobvarag’i va boshqa bank hisobvaraqlaridagi mablag’larini boshqaradi;
  
• 
  Pensiya jamg’armasi budjeti ijrosining budjet hisobini yuritadi;
  
• 
  Pensiya jamg’armasi budjetining daromadlari va xarajatlari balansliligiga ta’sir ko’rsatuvchi normativ-huquqiy hujjatlarni moliyaviy va iqtisodiy ekspertizadan o’tkazadi.
  

O’zbekiston Respublikasi Moliya vazirligi huzuridagi budjetdan tashqari Pensiya jamg’armasining hududiy bo’linmalari fuqarolarning pensiya ta’minoti va tibbiy-mehnat ekspertizasi masalalarining butun kompleksi uchun mas’ul bo’lgan Mehnat va aholini ijtimoiy muhofaza qilish vazirligi tizimiga kiruvchi funktsiyalar hamda tegishli tuzilmalarni topshirish hisobiga tashkil etildi. Natijada Moliya vazirligi huzuridagi budjetdan tashqari Pensiya jamg’armasi zimmasiga qo’shimcha ravishda quyidagi asosiy vazifalar va funktsiyalar yuklatildi:

• 
  fuqarolarning davlat pensiya ta’minotini tashkil qilish, fuqarolarga pensiyalar, ijtimoiy nafaqalar, kompensatsiya va boshqa to’lovlarni tayinlash, qonun hujjatlarida belgilangan tartibda pensiyalar hamda boshqa to’lovlarning miqdorlari qayta hisoblab chiqilishini ta’minlash;
  
• 
  pensiyalar hamda boshqa to’lovlarni to’liq hajmda moliyalashtirish va to’lanishini tashkil qilish, ular bo’yicha hisob va hisobotni yuritish;
  
• 
  pensiyalar tayinlanishi va qayta hisoblab chiqilishini tizimli asosda doimiy tahlil qilish va monitoringini olib borish, fuqarolarning pensiya ta’minotiga yo’naltiriladigan mablag’lardan qat’iyan maqsadli foydalanilishini ta’minlash;
  

• 
  mehnat mayibligi yoki kasb kasalligi oqibatidagi nogironlik bo’yicha tayinlangan pensiyalarni to’lashga mablag’larni da’volar bo’yicha aybdor yuridik va jismoniy shaxslardan belgilangan tartibda undirib olishni tashkil qilish;
  
• 
  tibbiy-mehnat ekspertizasi xizmati faoliyatini tashkil etish.