F. D. Xodjaboyev Navoiy davlat pedagogika instituti «Informatika va o‘qitish metodikasi»

Ta’minot manbai — SHK ning avtonom va tarmoqda energota’minoti tizimini o‘z ichiga olgan blok.
Taymer — mashina ichidagi haqiqiy vaqt elektron soati, u kerak bo‘lganda, joriy vaqt paytini avtomatik olishni ta’minlaydi (yil, oy, soatlar, minutlar, sekundlar va sekund ulushlari). Taymer avtonom ta’minot manbaiga — akkumulyatorga ulanadi va mashina tarmoqdan uzilganda ham ishlayveradi.
Klaviatura — foydalanuvchi uchun muhim qurilma bo‘lib, uning yordamida shaxsiy kompyuterlarga qiymatlar, buyruqlar va boshqarish ta’sirlari kiritiladi. Klavishlarga lotin va rus alfaviti harflari: o‘nli raqamlar; matematik, grafik va maxsus xizmat belgilari; tinish belgilari; ba’zi buyruqlar, jadvallar nomlari va boshqalar belgilangan.
SHK tipiga bog‘liq ravishda klavishalarning vazifalari, ularning belgilanishi va joylashishi o‘zgarib turishi mumkin.
Barcha klavishalarni quyidagi guruhlarga bo‘lish mumkin:
Harf-raqamli klavishalar - ular raqamlarni va matnlarni kiritish uchun mo‘ljallangan;
Kursorni boshqarish klavishalari - bu guruhdagi klavishalar sonli qiymatlarni kiritish ekranda matnni ko‘rib chiqish va tahrirlash uchun ishlatilishi mumkin;
Maxsus boshqaruvchi klavishalar - registrlarni qayta ulash, dastur ishini tuzish, ekrandagi narsalarni bosishga chiqarish uchun ishlatiladi;
Funksional klavishalar - ular servis dasturlarida boshqaruvchi, klavishlar sifatida keng ishlatiladi.
Harf-raqamli klavishalar klaviaturaning markaziy qismini egallaydi. Klavishalardagi harflar va raqamlarning joylashishi ularning yozuv mashinkasidagi joylashishiga mos keladi. Lotin harflari klaviaturada harfli klaviaturaning yuqori qismidagi birinchi oltita harf ketma-ketligi bo‘yicha nomlangan — QWERTY standarti bo‘yicha joylashgan. Kril alfbosi uchun harf-raqamli klavishalarning joylashishi rus shriftli yozuv mashinkalaridagi klavishlarning joylashishiga mos keladi (ЙЦУКЕН standarti — harfli klaviaturaning yu­qori qatoridagi birinchi oltita harf). Klaviaturadan kril harflarini kiritishni ta’minlash uchun mos drayver (maxsus dastur) kerak bo‘lib, u oldindan tezkor xotiraga yuklangan bo‘lishi va unda doimo qolishi kerak.