Глоссарий абсолют монархия

ДАВЛАТ КОРХОНАСИ - давлат бюджети маблағлари ҳисобидан ташкил қилинган, ўзларига бириктириб қўйилган мол-мулкка нисбатан қонунда белгилаб қўйилган доирада, ўз фаолиятининг мақсадларига, мулкдорнинг топшириқларига ҳамда мол-мулкнинг вазифасига мувофиқ ҳолда эгалик қилиш, ундан фойдаланиш ва уни тасарруф этиш ҳуқуқларини амалга оширувчи юридик шахсдир.
ДАВЛАТ МЕХАНИЗМИ - бу давлатнинг вазифа ва функцияларини амалга оширишга қаратилган давлат органлари, ташкилотлари ва муассасалари тизимидир.
Д. м. -бу давлат органлари, ташкилотлари ва муассасалари тизимидан иборат бўлиб, улар воситасида давлат ҳокимияти амалга оширилади ва жамият устидан давлатнинг раҳбарлиги таъминланади.
ДАВЛАТ МОҲИЯТИ деганда, унинг мазмуни, мақсади, давлат ҳокимиятининг кимга мансублиги ва у кимнинг манфаатларига хизмат қилишлиги тушунилади.
ДАВЛАТ ОРГАНИ - бу қонуний асосда ташкил этиладиган ва давлат ҳокимиятини амалга оширувчи муайян ваколатларга эга бўладиган давлат аппаратининг мустақил бир бўғинидир.
Д. о.- бу ҳокимият ваколатига эга бўлган ва давлат томонидан белгиланган тартибда ва ўзига берилган ваколатлар доирасида компетенциясини амалга оширадиган давлат аппаратининг бир қисмидир.
Д. о.- бу давлат аппаратининг алоҳида тузилмага эга бўлган нисбатан мустақил қисми. Давлат органларини тавсифловчи қуйидаги белгилар мавжуд:а)ҳокимият ваколатига эга; б) давлат номидан унинг вазифа ва функцияларини бажаради; с) муайян ҳуқуқ ва мажбуриятлар мажмуи-компетенциясига эга; д) муайян ҳуқуқий мустақилликка эга; е) ўз ички тузилишига ва тузилмасига эга; ж) муайян ҳудудда фаолият юритади; з) ўз ваколати доирасида бажарилиши лозим бўлган ҳуқуқий актлар чиқаради; и) қонунда белгиланган тартибда ташкил этилади; й) ўз шахсий таркиби ўртасида ҳуқуқий алоқаларни ўрнатади.
Давлат органларини қуйидагича таснифлашимиз мумкин: 1. Шаклланиш усулига кўра: бирламчи ва ҳосилавий (иккиламчи); 2. Фаолият ҳудудига кўра: марказий ва маҳаллий; 3. Компетенцияси характерига кўра: умумий компетенцияли ва махсус компетенцияли; 4. Ҳокимиятлар бўлиниши принципига кўра; қонун чиқарувчи, ижро этувчи ва суд; 5. Қарор қабул қилиш тартибига кўра: коллегиал ва якка тартибда фаолият кўрсатадиган давлат органлари.