Хуш келдинг янги кун

ХУШ КЕЛДИНГ ЯНГИ КУН
Одам ато Момо ҳаво дийдор куни,
Жамшид, Сиёвушнинг зафар учқуни,
Ажиб ҳодиса тун куннинг тутқуни,
Сен бугун барчага улашиб ризқ–рўз,
Хуш келдинг янги кун, ассалом Наврўз!

Илоҳий таъм бердинг сумалакка сен,

Нурдан жило бердинг камалакка сен,
Қизларни ўргатдинг жамалакка сен,
Мажнунтоллар сувга айтганида роз,
Хуш келдинг янги кун, ассалом Наврўз!

Новдалар кафтида тутдилар чечак,

Саҳий боғлар гўзал, мисли келинчак,
Ариқлар лабида кулиб бойчечак,
Шайланиб дунёга айтмоққа бир сўз,
Хуш келдинг янги кун, ассалом Наврўз!

Меҳр-оқибатнинг қўшиғи ўзинг,

Эзгу амалларнинг ошиғи ўзинг,
Сен хурлик кўшкидан қайта туғилдинг,
Янгиланган юртга бўлиб сарафрўз,
Хуш келдинг янги кун, ассалом Наврўз!

Шудгорига чорлаб бободеҳқонни,

Меҳнат завқи билан улашдинг шонни,
Она табиатдан олиб имконни,
Яшариш яловин айладинг кўз - кўз,
Хуш келдинг янги кун, ассалом Наврўз!

Кел, обод чаманда мангу яшаб қол,

Озод тафаккурнинг шуурини ол,
Доим эъзоздасан, кўрмайин завол,
Сен мендай хокисор, бегонамас - ўз,
Хуш келдинг янги кун, кутганим Наврўз!
Баҳром Инатулла