Ijtimoiy-madaniy masalalar / Mehnat. Aholining bandligi]

77-modda. Kasbiy malaka va bilimlarni rivojlantirish bo‘yicha tarmoq kengashlari
Tegishli vazirliklar, davlat qo‘mitalari va idoralari, birlashmalar, kompaniyalar va tashkilotlar tomonidan tuziladigan kasbiy malaka va bilimlarni rivojlantirish bo‘yicha tarmoq kengashlari (bundan buyon matnda tarmoq kengashlari deb yuritiladi) o‘z vakolatlari doirasida:
malakani baholash markazlarini akkreditatsiya qilishning maqsadga muvofiqligi to‘g‘risida xulosalar beradi;
kasbiy standartlarni ko‘rib chiqadi, ularni dolzarblashtirish bo‘yicha takliflar kiritadi;
kasbiy faoliyatning alohida turlari bo‘yicha malaka darajasini baholash uslubiyotini tasdiqlaydi va unga malakani baholash markazlari tomonidan rioya etilishini nazorat qiladi.
Tarmoq kengashlari tarkibiga kasaba uyushmalarining (ular birlashmalarining), ta’lim tashkilotlarining, ilmiy va boshqa tashkilotlarning vakillari majburiy tartibda kiritiladi.
Tarmoq kengashiga kasbiy faoliyatning bir necha turi bo‘yicha vakolatlar berilishiga yo‘l qo‘yiladi. Bir necha tarmoq kengashlariga kasbiy faoliyatning ayni bir turi bo‘yicha vakolatlar berilishiga yo‘l qo‘yilmaydi.
Tarmoq kengashlari faoliyatining moliyaviy ta’minoti tarmoq kengashlari tashkil etilgan vazirliklar, davlat qo‘mitalari, idoralar, birlashmalar, kompaniyalar va tashkilotlarning o‘z mablag‘lari hisobidan amalga oshiriladi.
78-modda. Kasbga o‘qitish markazlari
Ish qidirayotgan shaxslarni va ishsiz shaxslarni kasbga tayyorlash, qayta tayyorlash va ularning malakasini oshirishga doir faoliyatni amalga oshirish uchun mustaqil yuridik shaxs yoki yuridik shaxsning tarkibiy bo‘linmasi sifatida tashkil etilgan, belgilangan tartibda akkreditatsiya qilingan ta’lim muassasalari kasbga o‘qitish markazlaridir.
Kasbga o‘qitish markazlari o‘z faoliyatini ish qidirayotgan shaxslarni va ishsiz shaxslarni o‘qitish uchun kasbga o‘qitishga doir davlat buyurtmasi doirasida ajratiladigan mablag‘lar hisobidan, shuningdek o‘zini o‘zi moliyalashtirish asosida amalga oshiradi.
O‘qitish uchun amalga oshiriladigan to‘lov miqdori kasbga o‘qitish markazlari tomonidan mustaqil ravishda belgilanadi.