Inflyatsiya darajasi prognozi va maqsadli koʻrsatkichlarga erishishning asosiy omillari

Ehtimoliy xatarlar
Yaqin oylarda iqtisodiyotda inflyatsiyani oshiruvchi xatarlarning kuchayish ehtimoli pastligicha qolmoqda.
Shu bilan birga, inflyatsiyaning bir martalik omillarining vujudga kelish ehtimoli va inflyatsion kutilmalarning yuqori darajada saqlanib qolishi bilan bogʻliq xatarlar mavjud.
Yaqin istiqbolda oziq-ovqat mahsulotlari narxlarining oʻsishi xatarlardan biri sifatida qolmoqda. Proteksionistik siyosat, eksportyorlar tomonidan asosiy oziq-ovqat tovarlari eksporti boʻyicha cheklov choralarining (kvota va tariflar) kiritilishi asosiy oziqovqat tovarlari importining qimmatlashishiga olib kelishi mumkin.
Shu sababli, oziq-ovqat bozorlari barqarorligini oshirish koʻp jihatdan respublikada oziq-ovqat xavfsizligini taʼminlash kompleks strategiyasini ishlab chiqish va amalga oshirishga bogʻliq boʻladi. Ichki bozorni zaruriy tovarlar hajmi bilan taʼminlash boʻyicha taʼsirchan choralarni koʻrish, shu jumladan, bazaviy oziq-ovqat tovarlari importi geografiyasini diversifikatsiya qilish va konsentratsiyalashuvini qisqartirish muhim ahamiyatga ega.
Oʻzbekistonning rasmiy oltin-valyuta zaxiralari hajmi 584,2 mln. dollarga (yoki 34,9 mlrd. dollardan 34,3 mlrd. dollargacha) kamaydi.

Joriy yilning yanvar oyi uchun oltin zaxiralari hajmi 66,5 mln. dollarga koʻpaydi. Taʼkidlash kerakki, oltin zaxiralari oʻzgarishini hisobganda ikkita omilga eʼtibor berish lozim: oltin sof hajmining oʻzgarishi va jahon bozorida oltin narxining oʻzgarishi. 1-fevral holatiga koʻra oltin zaxiralarining sof hajmi yil boshidan beri 8,1 tonnaga (yoki 0,26 million troy unsiyaga) oshdi va bu oltin-valyuta zaxiralarining 482 mln. dollarga koʻpayishiga yordam berdi.
1-rasm. Oʻzbekistonning oltin-valyuta zaxiralarining oʻzgarishi mln. doll.

Manba: Markaziy bank maʼlumotlari asosida hisob-kitoblar
Biroq, joriy yilning yanvar oyi oxirida jahon bozorida oltin narxi yil boshiga nisbatan pasaydi. 2021-yil 29-yanvar London vaqti bilan soat 15:00 holatiga London oltin bozorida 1 troy unsiya oltin narxi 1863,8 dollarni tashkil etdi va shu yilning 4-yanvariga (1943,2 dollar) nisbatan 4,1 foizga kamaydi. Shuning uchun oltin narxining pasayishi natijasida oltin zaxiralari sof hajmi qoldiqlarini qayta baholash oltin-valyuta zaxiralarining 415 mln. dollarga pasayishiga olib keldi.

2-rasm. London oltin bozoridagi oltin narxi
(London vaqti bilan soat 15:00 holatiga, AQSH dollari)

Manba: Economic Research Federal Reserve Bank of St. Louis
Shunga qaramay, xalqaro zaxiralar tarkibida xorijiy valyutadagi zaxiralar hajmi 650,9 mln. dollarga kamaydi, shundan 636 mln. dollari (97,7%) bosh ofisi xorijda joylashgan banklardagi naqd valyuta va depozitlar boʻlsa, 14,9 mln. dollari - boshqa markaziy banklarda, Xalqaro valyuta jamgʻarmasi (XVJ) va Xalqaro hisob-kitoblar banki (XHKB)dagi valyuta zaxiralari.