Инглиз тилида турғун ибораларнинг ўзига хос хусусиятлари

Мавзунинг долзарблиги яна шу билан асосланадики, тил семантикасини ўрганиш юзасидан кўплаб ишлар амалга оширилган бўлсада, унинг айрим жиҳатлари ҳозирга қадар етарли даражада ўрганилган эмас. Тил деривацион имкониятларининг луғатларда акс эттирилиши ва фразеологик бирликларни семантик жиҳатдан талқин этиш ҳам шулар жумласига киради.
Фразеологик бирликлар табиатининг мураккаблиги боис, ҳозирга қадар амалга оширилган тадқиқот ишларида асосан фразеологик бирликларнинг ҳосил бўлиш йўллари ўрганилгани ҳолда уларнинг мазмундорлиги, маъно моҳияти лингвистик жиҳатдан тўла тадқиқ этилмаган. Тадқиқот ишида инглиз тили фразеологизмларининг семантик-структурал хусусиятлари батафсил кўриб чиқилади ҳамда уларнинг луғатларда қай тарзда акс эттирилиши ўрганилади. Юқорида таъкидлаб ўтилган масалалар мавзунинг долзарблигини кўрсатади.
Масаланинг ўрганилганлик даражаси. Фразеологик бирликларни тилнинг узвий ажралмас бўлаги сифатида кўриб чиқиш фразеологиянинг умумий ва ўзига хос қонуниятларини мукаммал ўрганиб чиқишни талаб этади. Фразеологик бирликларнинг семантик стилистик хусусиятларини таҳлил қилиш, барчага маълумки, жуда ҳам кенг қамровли соҳадир. Бу масалани луғатлар билан узвий боғланган ҳолда ўрганиб чиқиш масаласи ҳозирга қадар ижобий ҳал этилмаган.
Социолингвистика, умумий тилшунослик йўналишидаги айрим тадқиқотлар ишлари ҳам бу масалага бағишланган, аммо бу тадқиқотлар одатда умумий характерга эга бўлиб, фразеологик материалларга кам мурожаат этилган.
Тадқиқот ишининг мақсади фразеологик бирликларнинг семантик стилистик хусусиятларини ўрганиш ҳамда уларнинг маъно моҳиятини очиб беришда замонавий луғатларнинг тутган ўрнини таҳлил қилишдан иборат.
Ишнинг мақсадидан келиб чиққан ҳолда, тадқиқот олдида қуйидаги вазифалар турибди:
1.Инглиз тили фразеологик бирликларининг семантик стилистик хусусиятларини аниқлаштириш.
2.Фразеологияда семантик муносабатларни моделлаштириш ва уларнинг турли хил луғатларда акс этиш қонуниятларини таҳлил қилиш.
3.Фразеологизмлар мазмунларини номинатив нуқтаи назардан тадқиқ этиш.
4. Инглиз тили мақолларининг ўзига хос хусусиятларини таҳлил қилиш.