Jannat onalar oyog`i ostida

Bolalar “Onajon” qo‘shig‘ini aytib beradilar.
So‘ng “ Binafsha “ raqsiga tushib beradilar .


B. Yigit : Xushxabar keltirsa kim farzandidan,
Yo‘liga poyondoz to‘shaydi ayol.
Bo‘lsin u olima ,ishchi shifokor,
Dunyoda “ Bolam “ - deb yashaydi ayol !


B. Qiz : To‘g‘ri aytasiz, dunyoda bolam deb, kuyib yonmaydigan ayol
bo‘lmasa kerak . Keling shunday ayollarning qalbiga bir quloq solib
ko‘raylik, ular nima der ekanlar .


/Musiqa ostida sahnaga turli kasb egalariga xos kiyingan qizchalar yoki tarbiya-
chilar chiqib o‘zlarini tanishtirib she’r o‘qishadi./


Shifokor : Shifokorman oppoq xalatda,
Oppoq tilak bilan yashayman.
El sog‘-omon bo‘lsin albatta ,
Shunda men ham yayrab yashayman.
Shifokorman lekin avvalo ,
Farzandimga sodiq onaman.
Sochsalarda boshimdan tillo,
Bolam deyman , kuyib yonaman .


Muallima : Shogirdlarim jonu jahonim,
Hayotimning mazmun - ma’nisi.
Davrasida o‘tar har onim ,
Farzandlarim ular barisi .
Yaxshi ko‘rmay suyib qanchalar,
Muallima oddiy onaman,
Farzand shirin, aziz bunchalar,
Bolam deyman , kuyib yonaman .


Shoira : So‘z qaymog‘i suzilar betga,
Bahor misol yasharar olam.
Qog‘oz, qalam surilar chetga,
Nogahonda yig‘lasa bolam.
Dardga to‘la bag‘rim , yuragim,
Shoiraman lekin onaman.
El-yurt tinchi orzu tilagim,
Bolam deyman, kuyib yonaman .


Chevar : Qo‘llari gul mohir chevarman ,
Ish tikaman mehrimni qo‘shib.
Odamlarni dildan sevaman,
Xizmat qilay qalbimdan jo‘shib.
Ko‘zlarimda quvonch o‘t chaqnar,
Tole kulgan baxtli onaman.
Mashhur qildi elga shu hunar,
Bolam deyman , kuyib yonaman .


Tadbirkor ayol: Ishbilarmon tadbirkor ayol,
Yurt buguni, porloq ertasi.
Rejalarin demang puch xayol ,
Korxonaning rahbar bekasi .
Imkon qo‘lda qilmayman inkor,
Tadbirkorman, ayol-onaman.
Mansab, shuhrat arzimas zinhor,
Bolam deyman kuyib yonaman .


Zardo‘z : Iplarimning zari tillodan,
Bezaklarda quyosh aks etar .
Momomeros asli xudodan ,
Igna tutsam ular raqs etar.
Zardo‘stlik bu, hunar emas-san’at ,
Kasbim faxrim ammo onaman .
Mehrim ulug‘ tuganmas davlat,
Bolam deyman , kuyib yonaman .


Olima : Zaxmat chekib tunlar ko‘z ilmay ,
Jumboqlarning yetdim siriga .
Va aylandim so‘ng bilib bilmay ,
Bilim qasrin asirasiga .
Martabam zo‘r mashhur olima ,
Eng avvalo , shukur , onaman .
Tilda , dilda yolg‘iz kalima ,
Bolam deyman , kuyib yonaman .


/She’r yakunida boshlovchi yigit va qiz chiqib barcha she’r o‘qigan kasb egalari to-
mon o‘ng qo‘llarini ularga ishora holida she’r o‘qiydilar.
B. Yigit : Qay bir kasbda , qanday mansabda ,
Ishlamasin , ayol-bu ona!
Pokiza va nasli nasabda,
Farzandiga mudom parvona .


B. Qiz : Jasoratda erlardan o‘tar,
Ibo , hayo yo‘l bermas xiyol .
Dilin faqat bir sevinch o‘rtar,
Bolam deydi , dunyoda ayol .