Mavzu : Kimyoviy jihozlar va asboblar bilan tanishish

Qizdirish usullari. Kolbalarda, stakanlarda yoki chinni kosachalarda suyuqliklar qizdirilganda, ular ochiq alangada emas, balki asbest to`rlar ustiga qo`yib qizdiriladi. Ishqoriy eritmalar qizdirilganda ularga chinni bo'lakchalari yoki bir tomoni kavsharlangan kapillyar solish tavsiya qilinadi. Stakanlarda suyuqlik qizdirilganda, havodan tushishi mumkin bo'lgan ifloslanishdan saqlanishi uchun, ularni soat oynasi bilan yopish kerak. Eritmalar bug'latilganida (kosacha, stakan va boshqalarda) bu vazifani suyuqlik ustida shtativga o'rnatilgan keng voronka bajaradi. Probirka cho'kmasi bo'lgan suyuqlik yoki eritma qizdirilganda, u yog'ochdan yasalgan ushlagichga yoki shtativ qisqichiga salgina qiya qilib o'rnatiladi (probirkaning og'zi o'zingizdan va boshqalardan chetga qaratilgan bo'lsin). Gorelkaning past alangasida avval probirkaning butun qismi qizdiriladi (probirka ushlagich qizdirilmasin) keyin suyuqlikning yuqori qismi qaynaguncha qizdirilib, alanga pastga tushiriladi va butun suyuqlik qizdiriladi. Xuddi shu tartibda probirka ushlagich birga alangandan olinib tez-tez chayqatib qizdirilishi mumkin. Probirkada quruq moddalar qizdirilganda uning tubidan past qilib (nima uchun) shtativ halqasiga o'rnatiladi. Avval asta-sekin probirkaning butun qismi, keyin quruq modda solingan qismi ko'proq qizdiriladi.

11-rasm. Qizdirish usullari.

Mavzuni mustahkamlash uchun savollar:

1. 
   Ish stoli ustidagi kimyoviy idishlardan eng ko’p ishlatiladiganlarini ajrating va vazifalarini ayting.
   
2. 
   Probirka, stakan, Bunzen kolbasi, Erlenmeyer kolbasi, Vyurs kolbasi, Byuxner voronkasi, Tishchenko sklyankasining rasmlarini chizing.
   
3. 
   Shtativga kolba va probirkalarni joylashtiring.
   
4. 
   Byuks va tigel bir-biridan qanday farq qiladi?