Maxsus fanlarni o‘qitish qonuniyatlari va tamoyillari, uslubiyoti, fanning maqsadi va vazifalari

1. 
   Maxsus fanlarni o‘qitish qonuniyatlari va tamoyillari, uslubiyoti, fanning maqsadi va vazifalari.
   

Maxsus fanlarni o‘qitishdan maqsad - kelajakda sog‘liqni saqlash sohasi ta’lim tizimi, ehtiyojini qondira oladigan yuqori bilim, malaka va amaliy ko‘nikmalarga ega bo‘lgan magistr – shifokor - pedagoglarni tayyorlashdir.
Fanning vazifalari:
Ta’lim to‘g‘risidagi qonun hujjatlari, ta’lim muassasalarining huquqiy maqomlarini, ta’lim tizimi va turlarini, ta’lim tizimini boshqarish bo‘yicha bilim va ko‘nikmalarni shakllantirish;
-Maxsus fanlar bo‘yicha o‘quv me’yoriy hujjatlarni ishlab chiqish, ularni tashkil etish va tayyorlash uslubiyotini yanada rivojlantirish;
-Ta’limning psixologik asoslari, o‘qituvchi, talaba, mijoz o‘rtasidagi o‘zaro aloqalar, klinik fanlarni o‘qitishning o‘ziga xos xususiyatlari. Pedagogik faoliyatda shaxslararo muloqot, tibbiyot etikasi va deontologiyasining roli;
- Maxsus fanlarni o‘qitishni yanada takomillashtirish usullarini ishlab chiqish va ko‘nikmalarni rivojlantirish;
-Pedagogik faoliyatda sohaning o‘ziga xos xususiyatlarini inobatga olgan holda talabalarda bilim va ko‘nikmalarni egalllashning ilg‘or pedagogik, axborot texnologiyalarini tadbiq etishni yanada rivojlantirish;
-Mutaxasisligidan qat’iy nazar tibbiyot sohasi ta’lim tizimida faoliyat olib boruvchi yuqori malakali zamon talabiga javob beradigan mohir tibbiy - pedagoglarni tayyorlash.

2. 
   Kadrlar tayyorlash milliy dasturi.
   

Kadrlar tayyorlash milliy dasturi O‘zbekiston Respublikasining “Ta’lim to‘g‘risida”gi Qonuni qoidalariga, milliy tajribaning tahlili va ta’lim tizimidagi jahon miqyosidagi yutuqlar asosida tayyorlangan hamda yuksak umumiy va kasb-hunar madaniyatiga, ijodiy va ijtimoiy faollikka, ijtimoiy-siyosiy hayotda mustaqil ravishda mo‘ljalni to‘g‘ri ola bilish mahoratiga ega bo‘lgan, istiqbol vazifalarini ilgari surish va hal etishga qodir kadrlarning yangi avlodini shakllantirishga yo‘naltirilgandir.

Kadrlar tayyorlash tizimining demokratik o‘zgarishlar va bozor islohotlari talablariga muvofiq emasligi, o‘quv jarayonining moddiy-texnika va axborot bazasi yetarli emasligi, yuqori malakali pedagog kadrlarning yetishmasligi, sifatli o‘quv-uslubiy va ilmiy adabiyot hamda didaktik materiallarning kamligi, ta’lim tizimi, fan va ishlab chiqarish o‘rtasida puxta o‘zaro hamkorlik va o‘zaro foydali integratsiyaning yo‘qligi kadrlar tayyorlashning mavjud tizimidagi jiddiy kamchiliklar sirasiga kiradi.