Медиаматнлар тузилмаси

Медиаматнлар тузилмаси

Исталган маълумотни матний мулоқот орқали қабул қилиш - мураккаб жараён бўлиб, уни ташкил этишда махсус адресатга йўналтирилган компонентлар муҳим роль ўйнайди. Яъни матнни мулоқот майдонига киритиш стратегиясини яратиш, уни интерпритация (талқин этиш) бўйича иш жараёнини яратишда матнни қисмларга ажратиш ва ҳар бир қисмга қўйиладиган талабларни билиш талаб этилади. Матннинг ҳар бир қисмининг вазифалари мавжуд бўлиб, асосан уларнинг ҳаммаси матннинг мукаммал ва ўқишли бўлишига қаратилган.

САРЛАВҲА

Сарлавҳа матннинг асосий позицияси ҳисобланади. Бу муҳим унсурнинг вазифаси адресатнинг қабул қилиш жараёнига таъсир ўтказиш. Қабул қилиш нуқтаи назаридан сарлавҳага ёндашиш сарлавҳанинг тузилиш механизмларини ва унинг хусусиятларини тушунишга ёрдам беради. Реципиентнинг позициясини ҳисобга олиш жуда муҳим. Чунки ҳар бир реципиент алоҳида шахс бўлиб, материални ўрганиш жараёнида асосий фикрни сўзлар орқали қабул қилади.

Яхши сарлавҳа танлашнинг бир неча қоидаси мавжуд:

Сарлавҳа ўзига диққатни жалб қилиши, “ром” этиб олиши муҳим.

Мақолани охиригача ўқиб чиқишига қизиқиш уйғота олиши муҳим. Диққат: кўпинча талабни қондириш ва умид бағишлашга йўналиш берадиган ёки муаммони ечишга ёрдам берадиган сарлавҳалар ўқувчини кўпроқ ўзига жалб этади. Агар сарлавҳанинг ўзида барча “карталар” ошкор бўлса, мақолани ўқиш қизиқ ва керакли бўлмайди. Сизнинг вазифангиз мақолани ўқишга қизиқиш уйғотиш ва чорлаш. Сарлавҳа сўрамайди ва таклиф қилмайди, балки жалб қилади ва эълон қилади.

Сарлавҳа бир қарашда ўқиладиган бўлиши керак. Узун ва қисқа сарлавҳалар ичидан иккинчисини танланг.

Сарлавҳада мақола ёзилган аудиторияга тушунарли бўлган, улар томонидан кўп қўлланиладиган сўзлардан фойдаланинг. Сайт учун мақола ёзаётган бўлсангиз сарлавҳада мақолангизнинг асосий мазмунни ифодаловчи калит сўзларни ишлатинг.

Ҳаддан ташқари яхши – бу ёмон. Сарлавҳага ҳаддан ташқари кўп ундов ёки сўроқ белгилари орқали таъсирчанликни бериш ярамайди. Орфография қоидаларини ҳали ҳеч ким бекор қилмаган. Бундан ташқари, сарлавҳаларни катта ҳарфлар билан ёзиш шарт эмас. Бу албатта, таъсирчанликни беради, лекин аслида муаллиф бақираётгандек ёки жаҳл қилаётгандек туйилади.