Microsoft Word oyna sindi ziyouz com doc

---

Абдуқаҳҳор Иброҳимов. Ойна синди (трагикомедия) 
www.ziyouz.com kutubxonasi 
1
Абдуқаҳҳор ИБРОҲИМОВ 
 
ОЙНА СИНДИ 
 
Уч парда, саккиз кўринишли трагикомедия 
 
«Шарқ юлдузи» журнали 
2009 йил, 4-5-сон 
 
 
Қатнашувчилар:
 
Манзура – 40 ёшда, қиёфасидан анча ёш кўринади.
Мирсафо – 38 ёшда, гавдали, вужудидан жисмоний куч-қувват ёғилиб туради. 
Сайёра – 20 ёшда, чиройли. 
Ҳалимхон – 20 ёшда, новча ва хипча. 
Бурҳониддин – 68 ёшда, салобатли, кўринишдан 50 ёшларга боргандек туюлади. 
Даврон – 18 ёшда, қадамидан ўт чақнайди, кучли. 
Лазокат – 54 ёшда, қўпол ва семиз.
Аброр – 59 ёшда, қилтириқ. 
Меливой – 65 ёшда, нозик ва сатанг. 
Муяссар – 17 ёшда, чин гўзал.
 
БИРИНЧИ ПАРДА 
 
Биринчи кўриниш 
 
Манзуранинг шаҳар марказидаги кенг, беш хонали хонадони. Катта зал, деворларга 
гиламлар осилган, чет эл мебеллари билан жиҳозланган. Полга патгиламлар тўшалган. Катта 
ва ноёб қандил нур таратиб турибди. 
 
Саҳнада Манзура пайдо бўлади.
Узунчоқ катта стол устида идиш-товоқлар, ичимлик ва ичкилик шишалари айқаш-уйқаш 
бўлиб ётибди. Стуллар нари-бери бўлиб қолган. Бир стул оёғи осмондан бўлиб турибди. 
Буларнинг бари ҳали яқинда бу ерда базми жамшид бўлганидан дарак беради. Манзура 
хавотирланиб ён тарафдаги хонага кириб кетади ва тисарилиб қайтиб чиқади. 
Манзура. Вой шўрим, вой шўргинам, ёлғизгина қизим...  
Ҳали кайфи тарқалмаган Мирсафо тунги халатини судраганича чиқиб келади, бир-бирига 
тикилишади. Жимлик.