Ms word dagi tezkor tugmachalarni o’rganish (2 soat) Ishdan maqsad

MS Word dagi tezkor tugmachalarni o’rganish (2 soat)

Ishdan maqsad: Tinglovchilarda MS Word da  tezkor tugmachalardan foydalanish ko’nikmalarini shakllantirish.

Jihozlar va zarur materiallar:

1. 
   MS Office dasturlari o’rnatilgan shaxsiy kompyuterlar.
   
2. 
   Noutbuk va videop
   
3. 
   Internetdagi rashidxabibullayev.zn.uz sayti materiallari.
   

NAZARIY QISM

Kompyuter mutaxassislarini, kompyuterda samarali ishlaydigan odamlarni kuzatsangiz ularning sichqonchadan kam foydalanishiga guvoh bo’lasiz. Ular sichqoncha bilan bajariladigan amallarni klaviaturaning bir nechta tugmachasini birgalikda bosish orqali tez bajarib ketaverishadi. Bunday tugmachalar kombinatsiyasi kompyuter tilida tezkor tugmachalar (yoki qaynoq tugmachalar, горячие клавиши, hotkeys) deb yuritiladi. Bunga, misol qilib faylni pechatga chiqarish uchun birgalikda bosiladigan «Ctrl+P» kombinatsiyasini keltirish mumkin.

Tezkor tugmachalardan foydalanganimizda sichqoncha bilan ishlagandan ko’ra ish tezligimiz keskin ortadi. Chunki, barmoq bilan tugmachani bosish, sichqoncha bilan piktogrammani bosishga qaraganda kam vaqt talab etadi. Qizig’i shundaki, ish tezligimiz ortishi bilan xatolarimiz ham kamayib boradi. Chunki,  inson miyasining tabiati shunaqa – u juda tez ishlaydi va unga tezkor yordamchi zarur.

Tezkor tugmachalar bilan ishlashning boshqa afzallik tomonlari ham ko’p –ko’zimiz kamroq toliqadi, ish tezlashgan sari g’ayrat ham paydo bo’ladi va h.k.

Tezkor tugmachalarni o’rganish unchalik qiyin emas. Ko’nikib olguncha qiyinchiliklar bo’ladi, albatta. Eng asosiysi, shoshmasdan ishlang, tez ishlashingiz shart emas, lekin umuman xato qilmasdan ishlang. Keyinchalik, asta-sekin tezlikni orttirib boring. Va bir kun kelib, barmoqlaringiz «sizdan ruxsat so’ramasdan» zarur tugmachalarni o’zlari bosish ko’nikmasiga ega bo’lishadi.

Quyida Microsoft Word dasturida ko’p qo’llaniladigan tezkor tugmachalar keltirilgan.