Oʻzbek adabiyoti” kafedrasi jadid adabiyoti tarixi fanidan oʻquv- uslubiy majmua

1.O‘quv fani o‘qitilishi bo‘yicha uslubiy ko‘rsatmalar

I. O‘quv fannining dolzarbligi va oliy kasbiy ta’limdagi o‘rni

O‘zbekiston Respublikasi Birinchi Prezidentining AliSher Navoiy nomidagi Toshkent davlat o‘zbek tili va adabiyoti universitetini tashkil etish to‘g‘risidagi farmonida o‘zbek tili va adabiyotini, uning o‘ziga xos xususiyatlari, ilmiy-nazariy, falsafiy-estetik asoslarini, zamonaviy ta’lim texnologiyalarini chuqur o‘zlashtirgan davr talablariga javob beradigan yuksak malakali ilmiy va pedagog kadrlar tayyorlash vazifasi belgilandi. Shunga ko‘ra ta’limning magistratura bosqichida “Jadid adabiyoti tarixi” fanini zamon talablari darajasida o‘qitish davr taqozosidir.

Ilmiy jihatdan xolis o‘rganilishi asosan mustaqillik bilan bog‘liq bo‘lgan milliy uyg‘onish adabiyoti zamonaviy o‘zbek adabiyoti shakllanishida alohida o‘rin tutadi. Zamonaviy o‘zbek she’riyati, zamonaviy nasr (roman, hikoya), zamonaviy dramaturgiya (drama, tragediya), badiiy publitsistika janrlari ayni shu davrda shakllandi, rivojlanish bosqichiga kirdi. Ularning tadrijiy takomilini o‘rganish har jihatdan dolzarb masaladir.

“Jadid adabiyoti tarixi” fani mutaxassislik fanlari blokiga kiritilgan kurs hisoblanib, magistratura bosqichining o‘quv yilining 1-2-semestrida o‘qitiladi. Magistrantlarda jadid adabiyoti tarixi haqida muayyan tasavvur va bilim hosil bo‘lgach, ularga bu davr adabiyotining muammolari, uning maqsad va vazifalarini o‘rgatish, fan doirasidagi asosiy masalalarning mazmun-mundarijasini tushuntirish, fanning ustuvor yo‘nalishlari xususida aniq tasavvur uyg‘otish dolzarb sanaladi.