O‘zbekiston respublikasi jismoniy tarbiya va sport vazirligi

2-mavzu. Jismoniy tarbiya va sport sohasiga oid qonunosti hujjatlar.
Reja
2.1. O‘zbekiston Respublikasi Prezidentining jismoniy tarbiya va sportga oid farmonlari.
2.2. O‘zbekiston Respublikasi Prezidentining jismoniy tarbiya va sportga oid qarorlari.
3.3. O‘zbekiston Respublikasi Vazirlar Mahkamasining jismoniy tarbiya va sportga oid qarorlari.


2.1.O‘zbekiston Respublikasi Prezidentining jismoniy tarbiya va sportga oid farmonlari.

O‘zbekiston Respublikasi Prezidentining “O‘zbekiston Respublikasini yanada rivojlantirish bo‘yicha Harakatlar strategiyasi to‘g‘risida”gi 2017 yil 7 fevraldagi № 4947 sonli Farmoni va sport sohasida belgilangan vazifalar.

Harakatlar strategiyasini besh bosqichda amalga oshirish nazarda tutilgan, bunda yillarga beriladigan nomlarga muvofiq har yili uni amalga oshirish bo‘yicha ­Davlat dasturi tasdiqlanadi.
O‘zbekiston Respublikasi Prezidenti Shavkat Mirziyoevning 2018 yil 5 martdagi PF-5368-sonli “Jismoniy tarbiya va sport sohasida davlat boshqaruvi tizimini tubdan takomillashtirish chora-tadbirlari to‘g‘risida”gi Farmoni.
Yurtimizda jismoniy tarbiya va sportni ommalashtirish, aholi, ayniqsa, yoshlar o‘rtasida sog‘lom turmush tarzini targ‘ib qilish uchun zarur shart-sharoitlar va infratuzilmani yaratish, mamlakatning xalqaro sport maydonlarida munosib ishtirok etishini ta’minlash borasida izchil chora-tadbirlar amalga oshirilmoqda.
Shu bilan birga, jismoniy tarbiya va sportni tashkil etishda qator tizimli muammolar va kamchiliklarning mavjudligi ushbu sohada davlat siyosatini samarali olib borishga va mamlakatning mavjud sport salohiyatidan to‘liq foydalanishga to‘sqinlik qilmoqda. Xususan:
birinchidan, ayniqsa, joylarda jismoniy tarbiya va sport boshqaruvining samarali yaxlit tizimi mavjud emasligi ushbu sohada davlat organlari va boshqa tashkilotlar faoliyatini lozim darajada muvofiqlashtirishni, sog‘lom turmush tarzini ommalashtirish va targ‘ib qilishni ta’minlamayapti;