Parchalanuvchi qo‘l granatalarini uloqtirish usullari va qoidalari

238-rasm. Granatani avtomobildan uloqtirish usuli:

a, b, d — harakatlar ketma-ketligi.

granatani o‘ng qo‘lga, qurolni chap qo‘lga olib, saqlovchi tortqi sug‘urib olinadi;

qurol tutgan chap qo‘l bilan avtomobil borti ushlab turiladi va tanani ortga, ayni paytda o‘ngga burib, granata bilan quloch ochiladi;

granatani elka uzra olib o‘tib, oldinga keskin egilib uloqtiriladi va bort ortiga yashiriniladi.

Agar avtomobil tuynukka ega bo‘lsa, granatani uloqtirishdan oldin tuynukning qopqog‘ini ochish, uloqtirgach esa yopish lozim.

Granatani tankdan (o‘zi yurar artilleriya qurilmasidan) uloqtirish uchun quyidagi amallar bajariladi:

o‘qlovchi tayyorlangan granatani o‘ng qo‘lga olib, nishon tomonga buriladi va saqlovchi tortqini sug‘uradi;

tuynuk qopqog‘ini ochib, uning dastasidan tutib turadi;

granatani tuynuk orqali uloqtiradi va tuynuk qopqog‘ini zudlik bilan yopib qulflaydi.

Granatani transheya yoki okopdan uloqtirish uchun quyidagi amallar bajariladi (239-rasm):

qurol okop yoki transheya qopqog‘iga yotqiziladi;

granatani o‘ng qo‘lga olib, saqlovchi tortqi sug‘urib olinadi;

o‘ng oyoqni imkon qadar ortga tortib, bel va oyoqlar biroz bukiladi va granata ushlagan o‘ng qo‘l oxirigacha yuqoriga, ortga tortiladi;

chap qo‘lga tiralgan holda keskin to‘g‘rilanib, granata uloqtiriladi va transheya (okop) ichiga yashiriniladi.

Dushmanning okop, transheya yoki ochiq joyda mavjud bo‘lgan jonli kuchini yakson qilish uchun granatani gorizontga nisbatan 35°-45° burchak ostida, nishon ustiga tik tushirib, imkon qadar sakratmasdan uloqtirish zarur.