Режа: Давлат ва жамиятнинг ҳуқуқий асосларини шакллантириш ва либераллаштириш

Суверенитет ҳар қандай давлатнинг энг муҳим хусусиятидир. Суверенитет замонавий конституциявий ва халқаро ҳуқуқнинг асосий жиҳатларидан бири бўлиб, ўзаро боғлиқ бўлган иккита шаклга эга: булар -оммавий (миллий) суверенитет ва давлат суверенитетидир.
Халқ суверенитети шуни англатадики, фақат халқ давлатчилик асосидир ва халқ давлат ҳокимиятининг манбаи бўлиб хизмат қилади. Миллий суверенитет тушунчаси ва у ҳақдаги қарашлар XVIII асрда Европанинг буюк вакиллари томонидан шакллантирилган. У асосий тамойил сифатида 1789 йилдаги Инсон ва фуқароларнинг Франция Декларациясида қонуний равишда тасдиқланган. Оммавий суверенитет принципи, яъни, миллатнинг ўз тақдирини ўзи белгилаш ҳуқуқи одатда халқаро ва конституциявий ҳуқуқ томонидан тан олинган бўлади.
Давлат суверенитети деганда давлат ҳокимияти барча ички ишларда ва халқаро муносабатларда мужассамланадиган халқнинг иродасига асосланганлигини англатади. Давлат суверенитети, биринчидан, мамлакатда давлат ҳокимиятининг устунлиги; иккинчидан, давлатнинг бошқа давлатлар билан муносабатлари қандай бўлишини мустақил белгилаш ва уларнинг ички ишларига аралашмасликка асосланган бўлади. Ана шу тамойиллар асосида жаҳон ҳамжамиятида Ўзбекистон демократик ҳуқуқий давлатни шакллантириш, давлат суверенитетини мустаҳкамлаш, бунинг учун мустаҳкам қонунчилик базасини яратиш йўлидан қатъий қадам ташламоқда. Шу ҳақда гапириб, Ислом Каримов шундай деган эди:"Фақат қонун устуворлигига эришиш орқали биз адолатли жамият, фаровон ҳаёт барпо этиш имкониятига эга бўламиз".
Жамиятни сиёсий ислоҳ қилиш жараёнидаги қуйидаги босқичларни ажратиб кўрсатиш мумкин:
1-босқич - 1991-1994 йиллар - эски, якка партиявийлик, маъмурий-буйруқбозлик тизимини ва унга тегишли органларни тугатиш, янги давлатчиликнинг сиёсий ва ҳуқуқий асосларини яратиш, сиёсий ва маъмурий тузилмаларни шакллантириш. Ушбу босқичнинг аниқ воқеалари - бу Ўзбекистон Республикаси Президенти сайлови, янги Конституциянинг қабул қилиниши, янги сайлов тизимининг жорий этилиши, 1994 йил 25-декабрда бўлиб ўтган Ўзбекистон Республикаси Олий Мажлисига сайловлардир.