Revmatizm va yurak kasalliklari

3.Yurakning ishemik kasalligi. Bu kasallik yurak muskullari (miokard)ni ta’minlovchi qon tomirlarini torayishi tufayli miokardning kislorod va ovqat moddalar bilan ta’minlanishi buzilishi natijasida vujudga keladi.
Sababi: Ateroskleroz, gipertoniya kasalliklarining asorati, kam harakat qilish (gipodinamiya), spirtli ichimliklar iste’mol qilish, chekish kabilar.
Belgilari: yurak sohasida vaqti-vaqti bilan sezilar-sezilmas kuchsiz g‘ijimlovchi og‘riq, noxushlik his etish, jismoniy harakatlanganda yurak urishining tezlashuvi, nafas qisish, tez charchash, terlash.
Yurak ishemik kasalligining belgilari oylar-yillar davomida asta-sekinlik bilan kuchayib boradi va davolash tadbirlari o‘tkazilmasa stenokardiya, miokard infarkti kasalliklarining vujudga kelishiga sababchi bo‘ladi.
Tibbiy yordam: 1. Sog‘lom turmush tarziga amal qilish, ya’ni jismoniy va aqliy mehnatni navbat bilan bajarish, ertalabki gigiyenik gimnastika mashg‘ulotlarini muntazam bajarish, zararli odatlardan voz kechish, me’yorida ovqatlanish.
2.Yurakning ishemik kasalligi surunkali kechadi. Shu bois bemor poliklinikani kardiolog shifokori nazoratida davolanadi.
3. Har 2-3 oyda quyidagi davolash tadbirlari o‘tkaziladi:
- glyukoza 20-40% - 20 ml, askorbin kislota 5%-2 ml vena tomiriga har kuni 1 mahal 10 kun davomida;
- kokarbaksilaza-50 mg muskul orasiga yoki vena tomiriga 10 kun davomida;
- ATF- 1 ml muskul orasiga kuniga 1 mahal 10 kun davomida;
- vitamin B1- 1 ml, vitamin B6 - 1 ml, vitamin PP (nikotin kislota) – 1 ml har kuni 1 mahaldan muskul orasiga 10 kun davomida.
4.Yurak g‘ijimlaganda - valokordin yoki korvalol 20-30 tomchi 1 qoshiq suvga qo‘shib ichish.
4.Stenokardiya – yurak sohasida vaqti-vaqti bilan to‘satdan paydo bo‘ladigan sanchuvchi, g‘ijimlovchi og‘riq xurujlari bilan kechadigan kasallikdir.
Sababi. Gipertoniya va yurakning ishemik kasalligini o‘z vaqtida davolamaslik, o‘ta hayajonlanish, qayg‘urish, ruhiy va jismoniy zo‘riqish.
Belgilari. To‘satdan yurak sohasida sanchuvchi, g‘ijimlovchi og‘riqning paydo bo‘lishi. Og‘riq chap qo‘lga, yelkaga, bo‘yinga, kurak sohasiga tarqaladi.
Tibbiy yordam: 1.Og‘riq paydo bo‘lishi bilanoq bemor yotishi, buning iloji bo‘lmasa o‘tirishi kerak.
2.Validol yoki nitrogletsirin tabletkasi til ostiga qo‘yiladi. Bular bo‘lmasa valokardin, korvalol 25-30 tomchi 1 qoshiq suvga qo`shib ichiladi.
3.Ruhiy tinchlantirish uchun valerian 1 tabletka, yoki suyug‘idan 30 tomchi.
4.Arterial qon bosimi 130-80 mm dan oshgan bo‘lsa (gipertoniya) papazol, raunatin, adelfan (bittasi) – 1 tab. 2 mahal ichishga.
5.Yurak sohasidagi og‘riq takrorlansa og‘riq qoldiruvchi sifatida: papaverin 2 % -2 ml teri ostiga analgin-1-2 ml, novokain 0,5 % - 2 ml bitta shpritsda muskul orasiga.
6.Yuqoridagi tadbirlariga qaramasdan og‘riq takrorlanaversa tez yordam chaqirib bemor kardiologiya shifoxonasiga yuboriladi.