Talab va taklif elastikligi

3. Talabning narx bo`yicha elastikligi yordamida daromadlarni tahlil qilish 
Mahsulotga talab elastik bo`lganda (5.7-a-rasm), narxni P1 dan P2 ga tushirish 
natijasida ko`riladigan A yuzaga teng zararga (–TR) nisbatan, talabning Q1 dan Q2 
ga oshishi natijasida olinadigan B yuzaga teng qo`shimcha daromad (+TR)
ko`pligidan sotuvchining yalpi daromadi oshadi. Mahsulotga talab noelastik 
bo`lganda esa (5.7-b-rasm) narxni P1 dan P2 ga tushirish natijasida ko`riladigan A 
yuzaga teng zarar (–TR), talabning Q1 dan Q2 ga oshishi natijasida olinadigan B 
yuzaga teng qo`shimcha daromadga (+TR) nisbatan ko`pligidan sotuvchining yalpi 
daromadi qisqaradi. Masalan, yil yaxshi kelib, fermerlar yuqori hosil olganda, narx 
pasayib ketishidan ularning daromadi kamayib ketadi. Chunki, qishloq xo`jaligi 
mahsulotlariga bo`lgan talab elastikligi ancha past. Talab elastikligining bu 
xususiyatlarini bilish sotuvchilarga narxni o`zgartirish orqali daromadlarni oshirish 
imkoniyatini beradi. Bunda daromadning o`zgarishi narxning o`zgarishiga teskari 
bo`lganligidan, sotuvchilar talab elastikligi yuqori bo`lgan mahsulotlarning narxini 
pasaytirish orqaligina sotuvlar hajmini va daromadini oshirishlari mumkin. Talab 
noelastik bo`lgan holatda esa, narxni oshirish talab hajmini keskin qisqarishiga olib 
kelmaydi. Chunki, ko`pincha iste′molchilar uchun birlamchi ehtiyoj sanaladigan 
ne′matlarga talab noelastik hisoblanadi. Bunday sharoitda sotuvchilar daromadni 
oshirish uchun narxni ko`tarishlari mumkin. Ko`pchilik mamlakatlarda davlat talab 
elastikligi past (noelastik) bo`lgan tovar va xizmatlar narxini cheklab turadi. Aks 
holda elastiklik qonuniyatlaridan unumli foydalanib, sotuvchilar daromadlarini 
oshirish maqsadida noelastik talabga ega tovarlar narxini oshirib yuborishlari 
mumkin.

---