«тасдиқлайман» Бухоро давлат университети илмий ишлар ва инновациялар

Диссертация мавзусининг диссертация бажарилаётган олий таълим ёки илмий-тадқиқот муассасасининг илмий-тадқиқот ишлари режалари билан боғлиқлиги. Диссертация тадқиқоти “Урганч давлат университетини 2017-2030 йилларда ривожлантириш дастури”нинг 2.4 бандига асосан ва Урганч давлат университети илмий-тадқиқот режасига мувофиқ “Илмий-тадқиқот фаолиятини ривожлантириш ва илмий салоҳиятини оширишга йўналтирилган комплекс чора-тадбирлар дастури” доирасида бажарилган.
Тадқиқотнинг мақсади экологик муаммоларни бартараф этишда диний манбалардаги экологик ғояларнинг илмий аҳамиятини асослаш ва экологик инқирозлар ечимини топиш.
Тадқиқотнинг вазифалари қуйидагилардан иборат:
диний манбалардаги (Қуръон ва Ҳадислар) экологик муаммолар ечимига оид фикр-мулоҳазаларни қиёсий ва мантиқий таҳлил этиш, улар асосида экологик фалокатлар ечими йўлларини ёритиб бериш;
Юсуф Ҳамадонийнинг “Фи аннал-кавна мусаххарун лил-инсон” (“Коинот ва инсон ҳақида”) рисола”сини тадқиқ қилиш;
экологик маданиятни шакллантиришда диний (Қуръон ва Ҳадислар) ва тасаввуфий (“Коинот ва инсон ҳақида”) манбалар орқали диний-экологик одобни ёритиш;
экологик кўрсатмаларга риоя қилмасликнинг салбий оқибатларини Қуръон ва Ҳадислар орқали асослаш;
диний-экологик тафаккур умуминсоний қадриятлар сифатида инсониятнинг табиат олдида масъуллигини англашга эриштирувчи омил эканлигини асослаш;
экологик хавфсизлик муаммоларини ҳал этишда ҳар бир диннинг (Зардуштийлик, Яхудийлик, Ислом) ўрнини аниқлаш ва муаллифлик хулосаларини ишлаб чиқиш.
Тадқиқотнинг объектини экологик инқирозлар ечими борасидаги диний манбалар ташкил этади.
Тадқиқотнинг предмети экологик муаммолар ечими масаласида диний манбалардаги ғояларни ижтимоий-фалсафий таҳлил этиш ва уларни илмий асослаш билан белгиланади.
Тадқиқотнинг усуллари. Диссертацияда илмий билишнинг тарихийлик ва мантиқийлик, анализ ва синтез, объективлик, қиёсий таҳлил ва социологиядаги анкета усулларидан фойдаланилган.