Вирусли гепатитлар

Вирусли гепатитлар

Гепатит вируслари – гепатотроп вируслар бир нечта турларга булинади: А, В, С, Д, Е, F, G ва бошқалар. Бу вируслар бир-бирлари билан тузилиши, юқиш йуллари, антигенлари ва бошқа хусусиятлари бўйича фаркланади. Шу фаркланишлари асосида ҳар хил оилага киради. Гепатит вируслари асосан жигар гепатоцит хужайраларида репродукцияланади.

Гепатит А вируси
Гепатит А вируси (HAV-Hepatitis, F, virus) 1883 йили Picornoviridae оиласига ва энтеровируслар туркумига киритилган.
Юқумли гепатит қадимий касаллик бўлиб, Гиппократнинг асарларида ҳам сариқ касаллиги деб баён этилган.
Кейинчалик эпидемик гепатит, катарал сариқ касаллиги, паренхиматоз гепатит деб номланиб келинди. 1891 йили С.П.Боткин бу касалликни чуқур текшириб, юқумли эканлигини исботлаганлиги туфайли у Боткин касаллиги деб ҳам юритилади.
Гепатит А нинг қўзғатувчиси узоқ вақтгача номаълум бўлиб келди, кейинги йилларда унинг этиологияси тўғрисида аниқ маълумотларга эга бўлинди.
Морфологияси. Вирус икосаэдр ёки шарсимон шаклда бўлиб, катталиги 27–32 нм, вирион марказида бир ипли мусбат-РНК бор. Кубсимон симметрияга эга РНК молекуласи ташқи томонидан нуклеокапсид билан ўралган. Нуклеокапсид ўз навбатида 32 та капсомердан ташкил топган. Вирус таркибида ёғ ва углеводлар бўлмайди.
Кўпайтириш. Гепатит А вируси Жанубий Америкада яшайдиган мармозет ва шимпанзе маймунлари организмида кўпаяди. Вирус жигар ҳужайраларида узоқ вақт сақланади. Ҳозир вируснинг тўқима культурасига мослашган, кучсизлантирилган штамми олинган, аммо вирусни ҳужайрадан ажратиб олиш жуда мураккаб жараён.
Антигенлиги. Гепатит А вирусида 4 хил оқсил (VP1, VP2, VP3, VP4) борлиги аниқланган. Битта вирусга хос капсид оқсили билан боғлиқ антиген маълум.
Вируснинг иккита серологик типи мавжуд бўлиб, улар бир-бирига нисбатан кесишма иммунитет ҳосил қилмайди.
Чидамлилиги. Вирус бошқа энтеровирусларга нисбатан ташқи муҳит таъсирига чидамли; 60⁰ С қиздирилганда 1–2 соат, 100⁰С қайнатилганда ва УБ нурлар таъсирида тез, дезинфекция қилувчи моддалар таъсирида эса бир неча дақиқада ўз фаоллигини йўқотади.
Вируснинг юқиш хусусияти – 20⁰С да бир неча ой сақланиб қолади. Бемор ва вирус ташиб юрувчиларнинг нажаси ва сийдигида узоқ сақланади.