Glossariy alohida muhofaza

Ekologik jamg‘arma atrof-muhit muhofazasi va sanitar-gigienik holatini yaxshilashga qaratilgan tadbirlarni (dastur, reja, loyiha, konferensiya, munozara, uchrashuv, missiya) moliyaviy ta’minlash maqsadida tuzilgan pul jamg‘armalari.
Ekologik inqiroz ekologik tizimda modda va energiya almashinuvining tabiiy holatda kechishining buzilishi yoki modda va energiyaning kichik hamda katta aylanish jarayonlarining ma’lum bir bosqichdagi uzilishi.
Ekologik kadastr muayyan tabiiy ob’ektning geografik joylashuvi, huquqiy maqomi, miqdor, sifat tavsiflari hamda bahosi to‘g‘risidagi yangilanib turiladigan (o‘zgaruvchan) ma’lumotlar va hujjatlar to‘plami.
Ekologik konsepsiya tabiat va jamiyatning o‘zaro munosabati to‘g‘risidagi qarashlar tizimi, ya’ni bu moddiy dunyoda kishilarning o‘rni, ahamiyati va mohiyatini aks ettiruvchi dunyoqarashlar.
Ekologik memorandium diplomatik mulohazalar predmeti bo‘lgan ekologik masalalarni aks ettiruvchi hujjat.
Ekologik monitoring atrof tabiiy muhit va tabiiy resurslarning davriy o‘zgarishini (kadastr ma’lumotlariga asoslangan tarzda) kuzatib borish, hisobga olish, baho berish va istiqbolini belgilash tizimi.
Ekologik nazorat ekologik munosabat sub’ektlarining tabiiy resurslardan oqilona foydalanishlari va atrof tabiiy muhitni muhofaza qilishlariga oid faoliyatlarini vakolatlangan davlat organlari, nodavlat tashkilotlar va jamoat birlashmalari tomonidan tekshirib borish hamda tegishli chora-tadbirlarni amalga oshirish tizimi.
Ekologik siyosat muayyan davlatda yoki xalqaro miqyosda ma’lum bir yer, suv va havo kengligida yuzaga kelgan ekologik holatni hisobga olgan tarzda, atrof-muhitni yaxshilash hamda sog‘lomlashtirishga qaratilgan ichki va tashqi ijtimoiy-iqtisodiy harakat.
Ekologik sug‘urta sug‘urtalanuvchilarning pul jamg‘armalari hisobiga tashkil etilgan va ekologik xavfli oqibatlar yuzaga kelganda, ularning moddiy va ma’naviy zararlarini qoplash bo‘yicha amalga oshiriladigan moliyaviy munosabat.