Xolatini tuzatish

Ustoz otangdek ulug’.
Nuraliyeva Sayyora Abdijabborovna. Qashqadaryo viloyat

i Shahrisabz tumani 28-maktabning Boshlang’ich sinf o’qituvchisi

So’rdilar, dunyoda asli kim aziz,

Aytdilar, ustozdir, ustoz begumon.

Tag’in aytdilarki, aziz shubhasiz

Ustozni qadriga yetolgan inson!

O’qituvchi – mas’uliyatli va mashaqqatli kasb, og’ir va davomli mehnatni, sabr-toqatni talab qiladigan savobli ish. Insoniyat kamoloti uchun bugun bilimli, iqtidorli va hayotini baxsh etgan ustozlarning xizmatlarini hamma zamonlarda ham kishilar hurmatlab, o’zlarini esa e’zozlab kelishgan. Ustoz o’zidan keyin har bir insonning sezilmas, ammo juda muhim iz qoldiradi. Shu birgina so’z zamirida olam-olam ma’no va hurmat mujassam. Mashhur insonlarning aynan yuqori cho’qqilarga erishishlari ham ustozlarning beqiyos zahmatidir. Mazkur kasb azal-azaldan jamiyat uchun eng muhim hamda kerakli qadimiy kasb hisoblanadi. Avvalombor, o’qituvchi o’z kasbini sevishi, o’quvchilarning har biriga mehr qo’yishi, bor bilimu mahoratini hech qizg’anmay bolalarga o’rgatishi kerak. Kasbga muhabbat birinchi o’rinda turishi lozim. Shundagina o’qituvchi degan oily maqomga ega bo’ladi.

Dunyoda shunday insonlar bo’ladiki, ular har doim el ardog’ida, hurmat e’tiborida bo’lishadi. Bu kabi insonlar kelajak avlod ta’lim-tarbiyasiga mas’uldirlar. Shuningdek, yoshlarning kamoloti, barkamol inson bo’lib voyaga yetishlarida ularning mehnatlari tahsinga loyiqdir. Xalqimiz orasida “Ustoz otangdek ulug’”, - deya ta’rif beriladi. Haqiqatda ustozlarimiz ota-onalarimizdek aziz va jonkuyar, mehribon va sevimlidirlar. Biror kasb egasi yo’qki, ularning tarbiyasida bo’lmagan, mehr bulog’idan suv ichmagan. Dono xalqimiz bejizga “Ustoz ko’rmagan , har maqomga yo’rg’alar” ,- deya ta’kidlaydi. Shu bois, barcha kasb egalari borki, ustozlar ta’lim –tarbiyasini olgan va ulkan cho’qqilarni zabt etgan.

Bundan yigirma uch yil muqaddam , 1997 yilda O’zbekiston Respublikasi Birinchi Prezidenti I.A.Karimov tashabbuslari bilan el-yurtimizning ustoz-murabbiylarga bo’lgan yuksak ehtiromining amaliy ifodasi sifatida 1-oktyabr “O’qituvchi va murabbiylar kuni” deb e’lon qilindi.

Yurtimizda bugungi kunda ustozlarga barcha imkoniyatlar, shart – sharoitlar yaratilgan. Ularning mehnatlari e’zozlanib yurtimizda 1 oktyabr – “O’qituvchi va murabbiylar kuni” umumxalq bayrami sifatida keng nishonlanadi. Ularning faoliyati doimo munosib taqdirlanadi va qadrlanadi. Shu bois ustozlarimiz doimo e’zozda va e’tirofda. Aziz xalqimizning bir naqlida “Sen odamlarga bir yil yaxshilik qilmoqchi bo’lsang, bug’doy ek, o’n yil yaxshilik qilmoqchi bo’lsang, daraxt ek, yuz yil yaxshilik qilmoqchi bo’lsang, ta’lim-tarbiya ber” deyilgan. Shuning uchun ham ustoz deganda ko’nglimizda chuqur hurmat va ehtirom, cheksiz minnatdorlik tuyg’ulari, shu bilan birga hech qanday boylik bilan o’lchab, ado etib bo’lmaydigan qarzdorlik hissi paydo bo’ladi.

Inson yashar ekan, avvalo, unga bilim va ma’rifat dunyosi sari yo’l ochib bergan, uning qalbiga yuksak insoniy fazilatlar hissini singdirish yo’lida zahmat chekkan ustoz va murabbiylariga nisbatan ko’nglida hamisha minnatdorlik tuyg’usi bilan yashaydi. Shu jumladan men ham o’qituvchilik kasbini tanladim. Bunga sababchi bo’lgan mening mehribon va yuksak iqtidor sohiblari bo’lgan ustozlarimdir. Maktab ostonasiga ilk qadam qo’yganimizda qo’limizga qalam tutqazib, alifboni o’rgatgan birinchi ustozim Norqobilov Murodullo, boshlang’ich sinfligimda menga ta’lim bergan Norova Muhabbat, Beknayeva Dilorom ustozlarim, hamda yuqori sinfimda ko’p yutuqlarga erishishimga sababchi bo’lgan Diyalova Latofat, Nuraliyev Baxtiyor ustozlarimga cheksiz minnatdorlik bildiraman. Hozirgi kunda men ham sharafli kasbimdan faxrlanib ustozlarim bilan birga ishlab kelajak avlodga dars berib kelmoqdaman. Bizning jonkuyar rahbarimiz Raupov Erkin Mannonovichga ham hurmat va ta’zimdaman. Chunki ustoz deganda avvalombor shu aziz insonlarni ko’z oldimga keltiraman. Kelajakda mening ham shogirdlarim ulkan yutuqlarga erishib, vatanga munosib farzand bo’lib, o’z kasbini yetuk kadrlari bo’lishiga tilakdoshman.