Замонавий суғурта кўплаб суғурта турларини бирлаштиради. Бир миллий суғурта бозори учун суғуртанинг айрим турлари анъанавий, бошқаси учун экзотикдир

2 БОБ
2.1. Тасниф механизми: тасниф мезонлари, хорижий ва миллий формат
Замонавий суғурта кўплаб суғурта турларини бирлаштиради. Бир миллий суғурта бозори учун суғуртанинг айрим турлари анъанавий, бошқаси учун – экзотикдир. Суғуртанинг айрим турлари чуқур тарихий илдизларга эга, бошқалари яқинда пайдо бўлган ва илмий-технологик тараққиёт билан яратилган.
Шу муносабат билан суғурта операциялари таркибини тартибга солиш, демакки, суғурта операцияларини таснифлаш керак.
Суғурта операцияларини таснифлаш - суғуртани фаолият соҳалари, асосий йўналишлари ва турларига ажратишнинг илмий-амалий тизими. Тасниф бўғинлари - ҳар бир кейинги бўғин олдингисининг бир қисми ҳисобланади.
Суғурта операцияларини таснифлаш учун мезонларни танлаш керак (8-расм).

СУҒУРТА ТАСНИФИ
Мезонлар
Суғурта объекти	Суғурта шакли		Суғурталанувчилар формати
Суғурталовчилар ва уларнинг фаолият соҳалари		Суғурта жавобгарлиги доираси

8-расм. Суғурта таснифи мезонлари
Ҳар бир мезон суғурта секторини, суғурта операциялари гуруҳини ва суғурта турларини ажратишга асос бўлади. Ҳар бир миллий бозорда қабул қилинган суғурта таснифи амал қилади. Суғурта таснифининг амал қилишининг муҳим шарти унинг қонуний ва норматив тасдиқланиши ҳисобланади. Ривожланган ва ривожланаётган суғурта бозорига эга бўлган кўпгина мамлакатларда суғурта таснифи бўйича қонунчилик қарорлари амалдадир.