A qodiriy nomidagi jizzax davlat pedagogika instituti tarix fakulteti

Tezkor shtab va ko‘mak guruhlari: kunu tun fuqarolar bilan aloqada
Virus tarqalish geografiyasi kengayib borgani sabab barcha xorijdagi diplomatik vakolatxonalarimizda ham Tezkor shtablar tuzila boshlandi. Ana shunday ilk tezkor ko‘mak guruhlari faoliyati haqida so‘z borganda, O‘zbekistonning Janubiy Koreya, Yaponiya, Italiya, Erondagi vakolatxonalari huzurida ochilgan shtablarni qayd etish mumkin. Dunyo miqyosida eng ko‘p virus tarqalgan hudud sifatida baholangan ushbu davlatlardagi elchixonalarimiz tomonidan fuqarolarimizning 5 mingdan ortiq savoliga javob qaytarilib, ularni qiynab kelayotgan muammolarga yechim topildi. Yaponiyadagi elchixonamiz tomonidan O‘zbekiston fuqarolari uchun bepul asosda tibbiy niqoblar tarqatilishi yo‘lga qo‘yildi.
Joriy yil 16 martdan boshlab O‘zbekiston Tashqi ishlar vazirligi, xorijdagi 35 ta elchixona va 17 Bosh konsulxonamizda vatandoshlar murojaatlariga zudlik bilan javob berish uchun tunu kun ishlaydigan Tezkor shtablar faoliyati yo‘lga qo‘yildi. Ular ishini samarali tashkil etish maqsadida fuqarolarga masofadan turib ko‘mak berish imkoniyati yaratildi. Ya’ni ijtimoiy tarmoqlarda maxsus guruhlar tuzildi, internet resurslarida murojaatlarni qabul qilish bo‘yicha elektron manzillar ochilib, yagona qo‘ng‘iroq markazi (Call-center) – 1164 ishga tushirildi.
O‘zbekiston Respublikasi Tashqi ishlar vazirligi Tezkor shtabi ma’lumotiga ko‘ra, dastlabki ikki kun davomida “Call-center”ga 2 mingdan ortiq fuqaro murojaat qildi, Telegram messenjeri orqali o‘z savoliga javob olganlar 3 ming nafarga yetdi.
Elchixonalar qoshida tuzilgan shtablarga kelib tushayotgan murojaatlar asosan fuqarolarning vatanga qaytishda yordam ko‘rsatish masalasida bo‘lmoqda.
Qayd etish joiz, koronavirus epidemiyasi sabab aksar davlatlar xorijiy mamlakatlar bilan barcha xalqaro avia, avto va temir yo‘l qatnovlarini vaqtincha bekor qilishga qaror qilmoqda, o‘z chegaralarini birin-ketin yopmoqda.

O‘zbekiston fuqarolari uchun charter reyslar tashkil qilinmoqda
Mamlakatimizning xorijdagi diplomatik vakolatxonalari tomonidan hamkor davlatlar tegishli vakolatli organlari bilan muzokaralar olib borilib, O‘zbekiston fuqarolariga viza muddatini uzaytirish, charter reyslar tashkil etish choralari ko‘rilmoqda. Xususan, Tezkor shtablar faoliyati sabab 17-18 mart kunlari ana shunday charter reyslar Eron, Birlashgan Arab Amirliklari, Turkiya va Misrdan amalga oshirildi.
Ularda 650ga yaqin O‘zbekiston fuqarosi vatanga qaytarilib, karantin uchun maxsus tibbiy muassasalarga joylashtirildi.
– Rossiyada ham koronavirus bilan bog‘liq vaziyat dolzarb bo‘lib bormoqda, – deydi O‘zbekistonning Rossiyadagi Favqulodda va muxtor elchisi Bоtirjon Asadov. – Shu bois fuqarolarimiz murojaati asosida ularni O‘zbekistonga yetkazish maqsadida 17 mart kuni ilk charter reysni amalga oshirdik. Ayni paytda Rossiya hukumati bilan mamlakatning boshqa mintaqalaridan ham ana shunday aviaqatnovlarni tashkil qilish bo‘yicha muzokaralar olib borilmoqda.