«anatomiya» fani tematik papka

4.Kallaning pastki qiyshiq mushagi (m. obliquus capitis inferior)II bo’yin umurtqasi qirrali o’simtasidan boshlanib atlantning ko’ndalang o’simtasiga birikadi.
Faoliyati: boshni II umurtqa tishining bo’ylama o’qi atrofida buradi.
Ensa osti muskullarini barchasini n.suboccipitalis innervatsiya qiladi. Qon bilan ta’minlanishi a.cervicalis profunda.

Bo’yin fastsiyalari

Bo’yin sohasidagi fastsiyalarni turlicha bayon etiladi.
Topografiya nuqtai nazardan V.A.Shevkunenko bo’yinda 5 qavat fastsiyani tafovut qiladi.
1.Bo’yinning yuzaki fastsiyasi (fascia colli superficialis) teri ostida joylashgan yupqa parda bo’lib, bevosita yuzga va ko’krak sohasiga davom etadi. Bu fastsiyani ikki varag'i orasida m. platysma joylashadi.
2.Bo’yin xususiy fastsiyasining yuza varag’i (lamina superficialis fascia colli propria)yuqorida pastki jag’ga va chakka suyagi so’rg’ichsimon o’simtasiga, pastda to’sh suyagi sopining tashqi yuzasi va o’mrov suyagi o’rtasida tortilgan parda bo’lib bo’yinni o’rab turadi. Bo’yinning ikkinchi fastsiyasi orqa tomondan bo’yin umurtqalarning qirrali o’simtalari usti boylamiga va ustki ensa chizig’iga birikkan. Old tomonda qarama-qarshi fastsiya bilan birikib bo’yinning oq chizig'ini hosil qiladi. Bo’yinning ikkinchi fastsiyasi bo’yin umurtqalarining ko’ndalang o’simtalariga birikib uni oldingi va orqa qismlarga ajratuvchi fastsial devorni hosil qiladi. Shuning uchun bu sohalardagi yiringli jarayonlar biridan-biriga o’tmaydi. Bo’yinning ikkinchi fastsiyasi to’sh-o’mrov so’rg'ichsimon va trapetsiyasimon mushaklar uchun qin hosil qiladi.
3.Bo’yin xususiy fastsiyasining chuqur varag'i (lamina profundus fascia propria) asosan til osti suyagi bilan to’sh suyagi dastasi ichki yuzasi va o’mrov suyaklari o’rtasida tortilgan. U til osti suyagidan pastda joylashgan mushaklar uchun qin hosil qiladi. To’sh suyagi dastasidan yuqoriroqda bo’yinning II va III fastsiyalari o’rtasida bo’shliq (spatium interapanevraticum suprasternale) bor bo’lib, unda bo’yinning vena chigali joylashgan.
4.Bo’yin ichki fastsiyasi (fascia endocervicalis) ikki varaqdan iborat. Uning vistseral varag’i bo’yinda joylashgan har bir a’zoni alohida fastsial qin hosil qilib o’rasa, paretal varag’i barcha a’zolarni ustidan o’raydi. Buning natijasida ikkala varaq o’rtasida bo’shliqlar hosil bo’ladi. Kekirdak oldidagi shunday bo’shliq spatium pretrachealis ko’krak qafasigicha davom etadi.
5. Bo’yinning umurtqa oldi fastsiyasi (fascia prevertebralis) yuqorida ensa suyagining asosiy qismidan boshlanib, orqa ko’ks oralig'iga o’tib ketadi. Yon tomonda bo’yin umurtqalarining ko’ndalang o’simtalariga birikib, narvonsimon mushaklar uchun qin hosil qiladi.
Parij anatomik nomenklaturasiga asosan bo’yin fastsiyalari uchta plastinkadan iborat.